লকডাউনৰ বাবে অসমৰ বাহিৰত আবদ্ধ লোকসকলক পৰ্য্যায়ক্ৰমে ৰাজ্যলৈ ঘূৰাই অনাৰ বাবে অতিৰিক্ত আৰক্ষী সঞ্চালকপ্ৰধান (আইন-শৃংখলা) জি পি সিঙৰ অধ্যক্ষতাত এখন সমিতি গঠন কৰা হৈছে।
এই সন্দৰ্ভত কেন্দ্ৰীয় গৃহ মন্ত্ৰ্যালয়ৰ শেহতীয়া নিৰ্দেশনাৰ পিছতে অসমৰ ক’ভিড-১৯ বিষয়ক ৰাজ্যিক পৰ্য্যায়ৰ ক্ষমতাসম্পন্ন সমিতিয়ে এই সিদ্ধান্ত গ্ৰহণ কৰিছে।
সমিতিখনে বহিঃৰাজ্যত আবদ্ধ শ্ৰমিক, তীৰ্থযাত্ৰী, পৰ্য্যটক, শিক্ষাৰ্থীকে ধৰি সকলোকে ঘূৰাই অনাৰ ক্ষেত্ৰত নিয়মাৱলী (SoP) নিৰ্ধাৰণ কৰিব।
সমিতিখনৰ ন’ডাল অফিচাৰ হিচাপে এডিজিপি জি পি সিং আৰু বিকল্প ন’ডাল অফিচাৰৰূপে এডিজিপি (ছিকিয়ৰিটি) হৰমীত সিঙক দায়িত্ব দিয়া হৈছে।
সমিতিখনৰ বাকী সদস্যসকল হৈছে—অসম ৰাজ্যিক দুৰ্য্যোগ ব্যৱস্থাপনা কৰ্তৃপক্ষৰ চি ই অ’ এম এছ মনিভান্নান, এ এছ টি চিৰ পৰিচালন সঞ্চালক এ পি তিৱাৰী, এন এইচ এমৰ পৰিচালন সঞ্চালক ডঃ লক্ষ্মণন এছ আৰু পৰিবহণ আয়ুক্ত আদিল খান।
এটা দিনৰ ভিতৰতে সমিতিখনে তেওঁলোকৰ প্ৰতিবেদন দাখিল কৰিব।
অসমৰ ভিতৰত এই লোকসকলৰ যাতায়াতৰ বাবে পৰিবহণ বিভাগে এ এছ টি চিৰ সহযোগত বাছৰ যোগাৰ কৰিব আৰু এন এইচ এমে ইয়াৰ ব্যয় বহন কৰিব।
তাৰোপৰি ক’ভিড-১৯ বিষয়ক ৰাজ্যিক পৰ্য্যায়ৰ ক্ষমতাসম্পন্ন সমিতিয়ে ৰাজ্যৰ কিতাপৰ বিপণীসমূহ সোমবাৰৰ পৰা শনিবাৰলৈ পুৱা ১০ বজাৰ পৰা বিয়লি ৫ বজালৈকে খোলাৰ অনুমতি দিছে।
