আলফা (স্বাঃ)ৰ অভাৱনীয় সক্ৰিয়তাই ৰাজ্যত চৌদিশে এটা আতংকৰ পৰিৱেশ সৃষ্টি কৰাৰ মাজতে আজি কামাখ্য ষ্টেইশ্যনৰ পৰা ডেকাৰগাওঁ অভিমুখী ইণ্টাৰচিটী এক্সপ্ৰেছত হোৱা বিস্ফোৰণে চাঞ্চল্যৰ সৃষ্টি কৰিছে।
আমাৰ সংবাদদাতাই জনোৱামতে, আজি সন্ধিয়া কামাখ্য ষ্টেইশ্যনৰ পৰা ডেকাৰগাওঁ অভিমুখে গৈ থকা ১৫৮১৫ নম্বৰৰ ইণ্টাৰচিটি এক্সপ্ৰেছত সন্ধিয়া ৭ বজাত হৰিশিঙা ষ্টেইশ্যনৰ ওচৰত এটা দবাত বিস্ফোৰণটো ঘটে। চতুৰ্থ দবাটোত হোৱা এই বিস্ফোৰণটোত তিনিজন যাত্ৰী গুৰুতৰভাৱে আহত হৈছে। আহত এজনৰ নাম ৰাহুল দাস। আন দুজনক চিনাক্ত কৰিব পৰা হোৱা নাই। বিস্ফোৰণে যাত্ৰীসকলৰ মাজত এক আতংকৰ পৰিৱেশ সৃষ্টি কৰে।
অৱশ্যে ৰেইল আৰক্ষীয়ে এতিয়ালৈকে ইয়াক বিস্ফোৰণ বুলি নিশ্চিত কৰা নাই। ৰেইল আৰক্ষীৰ এজন শীৰ্ষ বিষয়াই ইয়াক শ্বৰ্ট-চাৰ্কিটৰ ঘটনা হোৱাৰ সম্ভাৱনা আছে বুলি কয়।
ইয়াৰ বিপৰীতে অসম আৰক্ষীয়ে ৰেইলত কোনোবাই কম শক্তিশালী বোমা স্থাপন কৰাৰ সম্ভাৱনা ব্যক্ত কৰে। ঘটনাৰ পিছতে বি টি এ ডিৰ আৰক্ষী মহাপৰিদৰ্শক অনুৰাগ আগৰৱাল ঘটনাস্থলীলৈ ৰাওনা হৈছে।
