সৌভাগ্য সফলতা নহয়: পতনৰ পাছতে উদ্ধৱ ঠাকৰেক কটাক্ষ ৰাজ ঠাকৰেৰ
ৰাজনৈতিক সংকটৰ পাছতে মহাৰাষ্ট্ৰৰ ক্ষমতা হেৰুওৱা উদ্ধৱ ঠাকৰেক কটাক্ষ কৰিছে ৰাজ ঠাকৰেই। মহাৰাষ্ট্ৰ নৱনিৰ্মাণ সেনাৰ মুৰব্বী ৰাজ ঠাকৰেয়ে বৃহস্পতিবাৰে মহাৰাষ্ট্ৰৰ উদ্ধৱ ঠাকৰে চৰকাৰৰ পতনৰ পাছতে জেষ্ঠ ভাতৃ উদ্ধৱ ঠাকৰেক সৌভাগ্য সফলতা নহয় বুলি কটাক্ষ কৰে।
ৰাজ ঠাকৰেই কয়, “যেতিয়া কোনোবাই নিজৰ সৌভাগ্যক নিজৰ ব্যক্তিগত সফলতা বুলি ভুল বুজে, তেতিয়া এজন ব্যক্তিৰ অৱনতিৰ দিশত যাত্ৰা আৰম্ভ হয়।”
মহাৰাষ্ট্ৰ বিধানসভাত অনুষ্ঠিত হ’বলগীয়া আস্থা ভোটৰ পূৰ্বেই বুধবাৰে নিশা পদত্যাগ কৰিছিল উদ্ধৱ ঠাকৰেই। জেষ্ঠ ভাতৃৰ পতনৰ পাছতে ৰাজ ঠাকৰেৰ এই মন্তব্যই সম্প্ৰতি তীব্ৰ চৰ্চা লাভ কৰিছে।
উল্লেখ্য যে শেহতীয়াকৈ পূৰ্বৰ উদ্ধৱ ঠাকৰেৰ নেতৃত্বত থকা মহা বিকাশ আঘাৰী চৰকাৰৰ সৈতে প্ৰত্যক্ষ ৰূপত সংঘাত সৃষ্টি হৈছিল ৰাজ ঠাকৰেৰ। বিশেষকৈ ধৰ্মীয় বিষয়ত এক উদাৰ নীতি গ্ৰহণ কৰাৰ বাবে শিৱসেনাক সমালোচনা কৰিছিল ৰাজ ঠাকৰেই।
মহাৰাষ্ট্ৰত ৰাজনৈতিক সংকটৰ সৃষ্টি কৰা বিসম্বাদী শিবিৰটোৰ সৈতে ৰাজ ঠাকৰে আলোচনাত মিলিত হৈছিল বুলিও খবৰ ওলাইছিল।
স্মৰ্তব্য যে ৰাজ ঠাকৰেই ২০০৫ চনত শিৱসেনাৰ পৰা আঁতৰি মহাৰাষ্ট্ৰ নৱনিৰ্মাণ সেনাৰ জন্ম দিছিল। তেতিয়াৰ পৰাই জেষ্ঠ ভাতৃ উদ্ধৱ ঠাকৰেৰ সৈতে বিবাদত লিপ্ত হৈ আহিছে ৰাজ ঠাকৰে।