আজিৰ পৰা শিৱসাগৰৰ ৰাজপথত উপলব্ধ হৈছে মাত্ৰ পাঁচ টকাতে এসাঁজ ভাত। শুনিবলৈ আঁচৰিত যেন লাগিলেও এই পদক্ষেপ লৈছে শিৱসাগৰৰ এটা এন জি অ’ই।
সাধাৰণতে এসাঁজ নিৰামিষ ভাতৰ বাবে হোটেল-ৰেষ্টুৰেণ্টত ভৰিব লগীয়া হয় ৪০ৰ পৰা ৫০ টকা। সেয়ে সাধাৰণ লোকসকলক সকাহ দিয়াৰ উদ্দেশ্যে ‘ৰংপুৰ ইনিটিয়েটিভ’ নামৰ এন জি অ’টোৱে পাঁচ টকাতে আগবঢ়াইছে এসাঁজ ভাত।
এই অনন্য তথা ব্যতিক্ৰমী প্ৰয়াসৰ আঁৰৰ যুৱক কেইজন হৈছে ক্ৰমে দীপজ্যোতি শৰ্মা, ৰমজান হুছেইন, কৰিম আলি, আফটাৰ হুছেইন আৰু আহমেদ হুছেইন।
জানিব পৰা অনুসৰি যুৱক কেইজনে সম্পূৰ্ণ নিজৰ মূলধনেৰে এই প্ৰচেষ্টা লৈছে।
শিৱসাগৰৰ কেইটামান নিৰ্দিষ্ট স্থানত উপলব্ধ হ’ব যদিও আজি প্ৰথম দিনা তেওঁলোকে বাবুপট্টি এল আই চি বিল্ডিঙৰ সন্মুখত ইয়াৰ যোগান ধৰে। প্ৰথম দিনটোত গ্ৰাহকৰ যথেষ্ট ভিৰ হোৱা পৰিলক্ষিত হোৱাৰ লগতে গ্ৰাহক সকলে ভাত সাঁজ তৃপ্তিৰে খোৱা বুলিও কয়।
আনহাতে বিশেষভাৱে সক্ষম লোকসকলক বিনামূলীয়াকৈ ভাত যোগান ধৰিব বুলিও জনায় এন জি অ’টোৰ কৰ্মকৰ্তাই।
যুৱক কেইজনৰ এই মহৎ প্ৰচেষ্টাক সমগ্ৰ শিৱসাগৰবাসীয়ে প্ৰশংসা কৰিছে।
ইফালে কোনো লোকে যদি সহায়ৰ হাত আগবঢ়াব বিচাৰে তেন্তে ৰংপুৰ ইনিটিয়েটিভ নামৰ ফে’চবুক পেজত গৈ যোগাযোগ কৰিব পাৰিব বুলি এন জি অ’ কৰ্তৃপক্ষই জানিবলৈ দিয়ে।
