অলিম্পিকত পদক জয় কৰিব স্বৰ্ণজয়ী অসম কন্যা হিমাই : পি টি উষা

ফিনলেণ্ডত অনুষ্ঠিত বিশ্ব এথলেটিকছ চেম্পিয়নশ্বিপৰ ২০ অনূৰ্ধ্ব ৪০০ মিটাৰত স্বৰ্ণ পদক অৰ্জন কৰি ইতিহাস সৃষ্টিৰে সমগ্ৰ দেশলৈ গৌৰৱ কঢ়িয়াই অনা হিমা দাসৰ প্ৰশংসাত পঞ্চমুখ হৈ পৰিছে দেশৰ প্ৰাক্তন দৌৰবিদ পি টি উষা।

কলকাতাৰ পৰা প্ৰকাশিত আগশাৰীৰ সংবাদপত্ৰ আজকালৰ সৈতে হোৱা এটি আছুতীয়া সাক্ষাৎকাৰত ‘পায়েলি এক্সপ্ৰেছ’ উষাই হিমাৰ শেহতীয়া সাফল্যক ভূয়সী প্ৰশংসা কৰে।

‘’অসম কন্যাৰ স্বপ্নৰ দৌৰৰ দিনা ফিনলেণ্ডত উপস্থিত আছিলো। অবিশ্বাস্য দৌৰ ! এথলেটিকছৰ সৈতে জড়িত হোৱাৰ ৪০ বছৰৰো বেছি হ’ল। দেশে-বিদেশে অনেক ভাৰতীয় এথলেটৰ দৌৰ দেখিছো। কিন্তু আন কোনো ভাৰতীয়ই এই ধৰণে দৌৰিব পৰা নাই। হিমাৰ মুখত প্ৰবল আত্মবিশ্বাস আছে,’’-পি টি উষাই এনেদৰে হিমা সম্পৰ্কত নিজৰ অভিব্যক্তি প্ৰকাশ কৰিছে।

কঠোৰ অনুশীলনৰ জৰিয়তে হিমাই ভাৰতলৈ অলিম্পিকৰ পদক আনিব বুলি দেশবাসীয়ে আশা কৰি থকাৰ সময়তে উষাই কয় যে ‘’এতিয়া এছিয়ান গেমছৰ কথা ভবা নাই। সমগ্ৰ ভাৰতবাসীয়ে হিমাৰ পৰা অলিম্পিকৰ পদক আশা কৰে। নিশ্চিতভাৱে হিমাই অলিম্পিকৰ পদক আনিবলৈ সক্ষম হ’ব।’’

আন্তঃৰাষ্ট্ৰীয় পৰ্যায়ত খ্যাতিমান দৌৰবিদ পি টি উষাই স্বৰ্ণকন্যা খ্যাত হিমা দাস সম্পৰ্কত প্ৰকাশ কৰা এনে উৎসাহজনক মন্তব্যই স্বাভাৱিকতে খেলুৱৈগৰাকীৰ লগতে সমগ্ৰ দেশবাসী তথা অসমবাসীক আলোড়িত কৰি ৰাখিব।