পৰ্যটকক আকৰ্ষিত কৰিবলৈ কাজিৰঙা ৰাষ্ট্ৰীয় উদ্যানত অচিৰেই আৰম্ভ হ’ব নদী ছাফাৰী

এশিঙীয়া গঁড়ৰ বাবে বিশ্বখ্যাত কাজিৰঙা ৰাষ্ট্ৰীয় উদ্যানত পৰ্যটকক আকৰ্ষিত কৰিবলৈ নতুন উদ্যোগ গ্ৰহণ কৰিছে চৰকাৰে । সেই অনুসৰি কাজিৰঙা ভ্ৰমণ কৰা দেশী-বিদেশী পৰ্যটকসকলে যাতে বিশাল লুইতৰ জলৰাশিৰ সৌন্দৰ্য উপভোগ কৰিব পাৰে তাৰ বাবে অচিৰেই ৰাষ্ট্ৰীয় উদ্যানখনত আৰম্ভ কৰা হ’ব নদী ছাফাৰী।

‘দ্য আছাম ত্ৰিবিউন’ নামৰ কাকতখনত প্ৰকাশিত এক প্ৰতিবেদন মতে ইতিমধ্যে এই সন্দৰ্ভত আভ্যন্তৰীণ জল পৰিবহণ বিভাগে পৰিবহণ বিভাগলৈ এক পত্ৰ প্ৰেৰণ কৰি বন বিভাগৰ সৈতে ব্ৰক্ষ্মপুত্ৰত এক যুটীয়া জৰীপ চলাবলৈ আহ্বান জনাইছে।

উল্লেখযোগ্য যে ভাৰতৰ আম্ভ্যন্তৰীণ জল পৰিবহণ কৰ্তৃপক্ষই অসম চৰকাৰক বিষয়টো প্ৰাথমিকতাৰ সৈতে  সম্পন্ন কৰিবলৈ আহ্বান জনোৱাৰ পাছতে ৰাজ্য চৰকাৰখনে এই ক্ষেত্ৰত উদ্যোগ গ্ৰহণ কৰা পৰিলক্ষিত হৈছে।

প্ৰসংগক্ৰমে উল্লেখযোগ্য যে গুৱাহাটীত শেহতীয়াভাৱে সম্পন্ন এক ৰোড শ্ব’ত কেইবাটাও সংস্থাই বিষয়টো উত্থাপন কৰি কাজিৰঙাত নৌকা বিহাৰৰ বাবে কোনো ঘাট নথকাটো উল্লেখ কৰিছিল।

সেয়েহে ভাৰতৰ আম্ভ্যন্তৰীণ জল পৰিবহণ বিভাগৰ অধ্যক্ষ গৰাকীয়ে অসম চৰকাৰক বিষয়টো প্ৰাথমিকতাৰে সম্পন্ন কৰিবলৈ আহ্বান জনাই বন আৰু পৰ্যটন বিভাগৰ যাৱতীয়া অনুমোদন ল’বলৈ আহ্বান জনাইছিল।

এই সন্দৰ্ভত আম্ভ্যন্তৰীণ জল পৰিবহণ বিভাগৰ সঞ্চালক বিবি দেৱ চৌধুৰীয়ে কয় যে চৰকাৰে বিভিন্ন প্ৰতিষ্ঠানৰ পৰা ইতিমধ্যে প্ৰস্তাৱ লাভ কৰিছে। আনহাতে আম্ভ্যন্তৰীণ জল পৰিবহণ বিভাগেও দুখন নৌকা নিৰ্মাণ কৰি আছে।

যদিহে উক্ত পৰিকল্পনা বাস্তৱায়িত হয় তেন্তে কাজিৰঙা ৰাষ্ট্ৰীয় উদ্যানৰ পৰ্যটনৰ বিকাশৰ বাবে ই হ’ব আন এক মাইলৰ খুঁটি। লগতে ইয়ে স্থানীয় নিৱনুৱা সকলক সংস্থাপনৰ বাট মুকলি কৰি দিব বুলি প্ৰকাশ কৰে সঞ্চালক গৰাকীয়ে।