পুনৰ উৰাবাতৰিৰ প্ৰভাৱ : চোৰৰ সন্দেহত স্থানীয় ৰাইজৰ হাতত প্ৰহৃত হ’ল যুৱক

ডকমকা কাণ্ডৰ পিছতে ৰাজ্যত পুনৰ উৰাবাতৰি প্ৰভাৱত এজন যুৱক স্থানীয় ৰাইজৰ হাতত প্ৰহৃত হ’ব লগীয়া হ’ল।

এইবাৰ সোপাধৰাৰ পৰিৱৰ্তে চোৰৰ উৰাবাতৰিৰ ফলত হোজাই জিলাৰ কোমোৰাকাটা গাঁৱত স্থানীয় ৰাইজে মৰিগাঁৱৰ ৰতন বৰদলৈ নামৰ এজন যুৱকক খুঁটাত বান্ধি নিৰ্মমভাৱে প্ৰহাৰ কৰে।

পিছত ঘটনাস্থলীত আৰক্ষী উপস্থিত হৈ যুৱকজনক উদ্ধাৰ কৰি চিকিৎসালয়ত চিকিৎসাৰ বাবে প্ৰেৰণ কৰে যদিও যুৱকজনৰ অৱস্থা বৰ্তমান সংকটজনক বুলি জানিব পৰা গৈছে। ফলত স্বাভাৱিকতে এই ঘটনাই অঞ্চলটোত এক চাঞ্চল্যৰ সৃষ্টি কৰিছে।

উল্লেখযোগ্য যে হোজাই-কাৰ্বি আংলং সীমান্তৰ গাঁও সমূহত ব্লেড, পঘা লৈ চোৰ সোমোৱা বুলি একাংশ দুষ্কৃতিকাৰীয়ে অপপ্ৰচাৰ চলায়। ফলত অঞ্চলটোৰ স্থানীয় ৰাইজ উত্তেজিত হৈ আছিল।

আনহাতে মণিপুৰত কৰ্মৰত ৰতন বৰদলৈ শুকুৰবাৰে নিজ ঘৰলৈ ৰে’লেৰে উভতি আহিছিল। ৰে’লেৰে আহি থকা অৱস্থাত চাপৰমুখ ষ্টেইশ্যন বুলি নিশা ভুলক্ৰমে হোজাই ৰে’ল ষ্টেইশ্যনত নামে আৰু পুৱাৰ ভাগত পথভ্ৰষ্ট হৈ কোমোৰাকটা গাঁৱত প্ৰৱেশ কৰে।

ইফালে সেই সময়তে কোমোৰাকটা গাঁৱৰ স্থানীয় ৰাইজে ৰতন বৰদলৈক আবদ্ধ কৰি বহু প্ৰশ্ন কৰিবলৈ ধৰে। আৰু পিছলৈ স্থানীয় ৰাইজে যুৱকজনক নিৰ্মমভাৱে প্ৰহাৰ কৰে।