বি পি এল পৰিয়ালক বিদ্যুৎ সংযোগৰ দাবীত বুকুত প্লে কাৰ্ড লৈ বৰপেটাত অভিনৱ প্ৰতিবাদ ফাৰুকৰ

অৰবিন্দ কেজৰিৱাল নেতৃত্বাধীন আম আদমী পাৰ্টি চমুকৈ “আপ” ৰ বৰপেটাৰ যুটীয়া সমন্বয়ক ফাৰুক খানে জিলাখনৰ কেইবাটাও সমস্যা সমাধানৰ দাবীত বিগত কিছুদিন ধৰি অকলশৰীয়াকৈ চলাই আহিছে প্ৰতিবাদ।

সৰ্বসাধাৰণ ৰাইজক অসুবিধা নিদিয়াকৈ ৰাইজৰ অভাৱ অভিযোগসমূহ চৰকাৰক দৃষ্টিগোচৰ কৰাৰ উদ্দেশ্যে অকলে প্ৰতিবাদী কাৰ্যসূচী ৰূপায়ণ কৰি অহা ফাৰুক খানে বৃহস্পতিবাৰে বৰপেটা চহৰৰ ভকতপাৰাস্থিত অসম শক্তি বিতৰণ কোম্পানী লিমিটেডৰ কাৰ্যালয়ত ৰূপায়ণ কৰে এক অভিনৱ প্ৰতিবাদী কাৰ্যসূচী৷

কাৰ্যালয় প্ৰাংগনত ” আপ”ৰ নেতা গৰাকীয়ে বুকুত এখন প্লেকাৰ্ড লৈ প্ৰতিটো বি পি এল পৰিয়ালক বিনামূলীয়া বিদ্যুৎ সংযোগ নিশ্চিত কৰাৰ দাবী উত্থাপন কৰা দেখা যায়। এই বিষয়টো সন্দৰ্ভত খানে অসম শক্তি বিতৰণ কোম্পানী লিমিটেডৰ বিষয়াক এখন স্মাৰক পত্ৰও প্ৰদান কৰে৷

স্মাৰক পত্ৰত উল্লেখ কৰে যে দৰিদ্ৰ সীমা ৰেখাৰ তলৰ পৰিয়ালক বিদ্যুৎ সংযোগ কৰি দিয়াৰ বাবে চৰকাৰে বিভিন্ন আঁচনি গ্ৰহণ কৰিছে যদিও বহু পৰিয়ালে এতিয়ালৈ প্ৰাপ্য বিদ্যুৎ সংযোগৰ পৰা বঞ্চিত হৈ আছে৷ জিলাখনৰ বঞ্চিত বি পি এল পৰিয়ালক শীঘ্ৰে বিনামূলীয়া বিদ্যুৎ সংযোগৰ ব্যৱস্থা নিশ্চিত কৰাৰ দাবী জনায় নেতা গৰাকীয়ে ৷