অভিযোগ হাঁহৰ মাংস খোৱাৰ : ৰিপুন বৰাৰ প্ৰশ্ন-পাৰ্থৰ তেতিয়া জন্ম হৈছিল নেকি?

বঙহৰ যুঁজে তীব্ৰ ৰূপ ধাৰণ কৰিছে কংগ্ৰেছত। পোনপটীয়াকৈয়ে দলৰ ভিতৰচ’ৰাতে পৰস্পৰে পৰস্পৰৰ মাজত বাকযুদ্ধত লিপ্ত হৈ পৰা দেখিবলৈ পোৱা গৈছে।

মাথোঁ কেইদিনমান পূৰ্বে শ্ব’কজ নিদিয়াকৈ এনএছয়ুআইৰ প্ৰাক্তন সভাপতি পাৰ্থ প্ৰতীম বৰাক কংগ্ৰেছ দলৰ প্ৰাথমিক সদস্য পদৰ পৰা নিলম্বন কৰাৰ পাছত প্ৰদেশ কংগ্ৰছৰ ভিতৰে-বাহিৰে এতিয়া তীব্ৰ প্ৰতিক্ৰিয়াৰ সৃষ্টি হৈছে  ।

ইয়াৰ মাজতে আজি নিলম্বিত এনএছয়ুআইৰ প্ৰাক্তনসভাপতি পাৰ্থ প্ৰতিম বৰাই মহানগৰীৰ গ্ৰেণ্ড ষ্টাৰলাইন হোটেলত এক সংবাদমেলৰ আয়োজন কৰি নিজৰ ক্ষোভ প্ৰকাশ কৰে।

উক্ত সংবাদমেলতে পাৰ্থ প্ৰতিম বৰাই ৰিপুন বৰাৰ বিৰুদ্ধে গুৰুতৰ অভিযোগ তোলাৰ লগতে ৰিপুন বৰাই ইন্দিৰা গান্ধীৰ মৃত্যুৰ সময়ত হাঁহ মাৰি ভোজ খোৱাৰ কথাও উল্লেখ কৰিছিল।

ইপিনে, দলৰ পৰা নিলম্বিত পাৰ্থ প্ৰতিম দাসে অনা অভিযোগ সম্পূৰ্ণ ভিত্তিহীন বুলি নৰ্থ ইষ্ট নাওৰ আগত মন্তব্য কৰি প্ৰদেশ কংগ্ৰেছৰ সভাপতি ৰিপুন বৰাই কয়, ‘’ইন্দিৰা গান্ধীৰ মৃত্যুৰ সময়ত পাৰ্থৰ জন্মই হোৱা নাছিল। তেওঁ এই কথা দেখি আছিল নেকি? তেওঁ আগতে এই কথা প্ৰমাণ কৰক।‘’

তেওঁ লগতে কয়, ‘’ছাত্ৰ জীৱনৰ পৰা কি কৰি আছো, সেই বিষয়ে দেখা মানুহে কওঁক। তেতিয়া মই অসামৰিক সেৱাৰ চাকৰিত আছিলো।‘’

তেওঁ লগতে পাৰ্থ প্ৰতিম বৰাই ফটুৱা কথা কিছুমান কোৱা বুলিও ব্যক্ত কৰে।

তাৎপৰ্য্যপূৰ্ণভাৱে কংগ্ৰেছ দলটোক দুৰ্বল কৰাৰ বাবে পাৰ্থক কোনোৱাই অস্ত্ৰ হিচাপে ব্যৱহাৰ কৰা বুলি কয় বৰাই।

তদুপৰি, দলৰ জ্যেষ্ঠ মুখপাত্ৰ অপূৰ্ৱ ভট্টাচাৰ্য্যই এই সম্পৰ্কত কয় যে দলৰ সভাপতি গৰাকীৰ ওপৰত তেওঁলোকৰ কোনো আস্থা-বিশ্বাস হেৰুওৱা নাই। তেওঁ লগতে অভিযোগ কৰে যে ‘’পাৰ্থপ্ৰতিম বৰাই এটা বিশেষ এজেণ্ডা লৈ কাম কৰি আছে।‘’

আনহাতে, পাৰ্থ প্ৰতিম বৰাই ৰিপুন বৰাৰ নেতৃত্বত কংগ্ৰেছ দলে ২০১৯ চনত বিজেপি চৰকাৰক প্ৰত্যাহ্বান জনাব নোৱাৰিব বুলি কোৱা মন্তব্য সম্পৰ্কত প্ৰতিক্ৰিয়া প্ৰকাশ কৰি ভট্টাচাৰ্যই নৰ্থ ইষ্ট নাওক কয়, ‘’পাৰ্থ প্ৰতিম বৰাই অনা অভিযোগৰ উত্তৰ দিবৰ বাবে দল বাধ্য নহয়। তেওঁ দলৰ নিয়ম-নীতি নৰখাকৈয়ে কথা-বতৰা অথবা কাম-কাজসমূহ কৰিছিল বা কৰি আছে। তেওঁ কোৱা কথাৰ কোনো ভিত্তি অথবা যুক্তি নাই।‘’

‘’নিকৃষ্ট ৰাজনীতি ৰূপায়ণ কৰাৰ স্বাৰ্থতে নতুন প্ৰজন্মৰ এন এছ য়ু আইৰ কৰ্মীসকলক বিপথে পৰিচালনা কৰিছে। ৰিপুন বৰাৰ নেতৃত্বত যদি সন্দেহেই আছিল তেন্তে তেওঁ এ পি চি চিৰ সম্পাদক পদটো কিয় লৈছিল,’’- ভট্টাচাৰ্য্যই কয়।

আনহাতে, প্ৰাক্তন মুখ্যমন্ত্ৰী তথা জ্যেষ্ঠ কংগ্ৰেছ নেতা তৰণ গগৈৰ এই সম্পৰ্কে প্ৰতিক্ৰিয়া জানিব বিচৰাত কয়, ‘’এই বিষয়ত একো কমেন্ট দিবলৈ নাই। মইটো নাজানোৱে, মই একো দেখাই নাই। মই ৰিপৰ্ট দেখাই নাই, মই কি ক’ম?’’