অৰুণাচলৰ ৰাজভৱনত ভাৰত স্কাউট আৰু গাইডৰ ১৯তম ৰাজ্য পুৰস্কাৰ প্ৰদান

অৰুণাচলৰ ৰাজ্যপাল অৱসৰপ্ৰাপ্ত ব্ৰিগেডিয়াৰ বি ডি মিশ্ৰই আজি ৰাজভৱনৰ দৰবাৰ হলত আয়োজিত ভাৰত স্কাউট আৰু গাইডৰ ১৯সংখ্যক ৰাজ্য পুৰস্কাৰ অনুষ্ঠানত উপস্থিত থাকে।

ৰাজ্যখনৰ ১১খন জিলাৰ পৰা অহা মুঠ ৪২গৰাকী স্কাউট আৰু গাইডক ৰাজ্যপালগৰাকীয়ে স্কাউট আৰু গাইডৰ সৰ্বোচ্চ ৰাজ্যিক স্কাউট আৰু গাইড বঁটা প্ৰদান কৰে। স্কাউট আৰু গাইডসকলে প্ৰতিনিধিত্ব কৰা ১১খন জিলা হৈছে টিৰাপ, পূব ছিয়াং, নিম্ন ডিবং উপত্যকা, নামচাই, উজনি সুৱণশিৰি, লোহিত, পাপুম পাৰে, নামনি সুৱণশিৰি, পশ্চিম ছিয়াং, উজনি ছিয়া আৰু ছিয়াং জিলা।

উল্লেখযোগ্য যে ৰাজ্যপাল হৈছে স্কাউট আৰু গাইডৰ ৰাজ্যিক পৃষ্ঠপোষক। এই বঁটা প্ৰদান অনুষ্ঠানত অৰুণাচলৰ শিক্ষা মন্ত্ৰী হনচুম নংদাম (Honchun Ngandam) আৰু শিক্ষা বিভাগৰ শীৰ্ষ বিষয়াসকল উপস্থিত আছিল। এই অনুষ্ঠানত স্কাউট আৰু গাইডসকলে প্ৰাথমিক চিকিৎসা প্ৰদানৰ এটা প্ৰদৰ্শন কৰে।

ৰাজ্য পুৰস্কাৰক ৰাজ্যপালৰ বঁটা হিচাপেও জনা যায়। এই ৰাজ্যিক পৰ্যায়ৰ বঁটাটো মানুহৰ প্ৰতি আন্তৰিক সেৱা আগবঢ়োৱা স্কাউট আৰু গাইডলৈ আগবঢ়োৱা হয়।

বঁটা লাভ কৰা স্কাউট আৰু গাইডসকলক অভিনন্দন জ্ঞাপন কৰি ৰাজ্যপালে কয় যে এই পুৰস্কাৰে তেওঁলোকৰ কঠিন পৰিশ্ৰমক প্ৰতিফলিত কৰে আৰু এই পুৰস্কাৰ তেওঁলোকৰ প্ৰাপ্য।

ভাৰতীয় সংবিধানত উল্লেখিত স্কাউট আৰু গাইডৰ প্ৰাথমিক কৰ্তব্যসমূহ উল্লেখ কৰি ৰাজ্যপালগৰাকীয়ে স্কাউট আৰু গাইডসকলক বৈজ্ঞানিক মানসিকতা, মানৱতা আৰু অনুসন্ধান আৰু সংস্কাৰৰ স্পৃহাৰে কৰ্তব্যত ব্ৰতী হ’বলৈ আহ্বান জনায়। তেওঁ শিক্ষাৰ্থীসকলক সাহস, ক্ষমা, নিৰংকাৰিতা, সাধুতা, পৰিচ্চন্নতা, আত্ম নিয়ন্ত্ৰণ, প্ৰশান্তি, জ্ঞান, সত্য কথা কোৱা আৰু ক্ৰোধ পৰিহাৰ মানৱীয় প্ৰমূল্যৰ সৈতে যুক্ত হোৱাৰ বাবে আহ্বান জনায়।