অৰুণাচল প্ৰদেশত সেনাই আটক কৰিলে এন এচ চি এন (আৰ)ৰ দুজন দুৰ্ধৰ্ষ সদস্যক

অৰুণাচল প্ৰদেশৰ চংকিং গাঁৱৰ পৰা সেনা বাহিনীয়ে আজি মঙলবাৰে এন এচ চি এন (আৰ)ৰ দুজন দুৰ্ধৰ্ষ সদস্যক আটক কৰিবলৈ সক্ষম হয়।

সদস্য দুজনক চানং মেচ্চা আৰু জিমৰেৱেচ কিমচিং বুলি চিনাক্ত কৰা হৈছে। তেওঁলোকৰ হাতৰ পৰা এটা পিস্তল আৰু গুলী বাৰুদ জব্দ কৰা হৈছে বুলি সেনাবাহিনীৰ সূত্ৰই দাবী কৰিছে।

সেনাৰ সূত্ৰই জানিবলৈ দিয়া মতে আজি কাহিলিপুৱাতে সেনাৰ জইৰামপুৰ বেটেলিয়নে গাঁওখনত চলোৱা এক তালাচী অভিযানত এই লোক দুজনক গ্ৰেপ্তাৰ কৰিবলৈ সক্ষম হয়।

সদস্য দুজন বোলে অৰুণাচলৰ মিয়াও অঞ্চলত ধন দাবীৰ ঘটনাৰ লগত জড়িত আছিল।

সেনাবাহিনীৰ জন সম্পৰ্কৰক্ষী বিষয়া (ক’হিমা) কৰ্নেল চি কনৱাৰে জনায় যে দাও ডিৱিজনৰ নেতৃত্বত যোৱা এসপ্তাহত দুজন দুৰ্ধৰ্ষ সদস্য হত্যা কৰাৰ লগতে অন্য ৫ জন সদস্যক আটক আৰু বহু সংখ্যক অস্ত্ৰ-শস্ত্ৰ জব্দ কৰিবলৈ সক্ষম হৈছে।

কৰ্নেল কনৱাৰে কয়, ‘দক্ষিণ অৰুণাচলত সেনাই চলোৱা তীব্ৰ অভিযানে অঞ্চলটোত সংগঠনটোৰ সদস্যসকলে চলাই থকা ধন দাবী কাৰ্য্যকলাপৰ ওপৰত আঘাত হানিছে।’