আজমলৰ আত্মীয়ৰ নামত ৰচিদ : ডিমৌত আৰক্ষীয়ে জব্দ কৰিলে চোৰাং সাঁচিকাঠ ভৰ্তি ট্ৰাক

আজি পুৱা ডিমৌ আৰক্ষীয়ে গোপন সুত্ৰৰ পম খেদি লক্ষাধিক টকাৰ চোৰাং সাঁচিকাঠ কঢ়িয়াই অনা এখন গাড়ী জব্দ কৰে। ৰাজ্যত গোপনে মূল্যবান কাঠৰ ৰমৰমীয়া বেহা চলি থকাৰ সুযোগতে ডিব্ৰুগড়ৰ ৰাজগড়ৰ পৰা নগাঁৱৰ লংকালৈ বুলি আনি থকা AS 01 DD 6723  নম্বৰৰ এখন ট্ৰাক আৰক্ষীয়ে গোপন সুত্ৰৰ ভিত্তিত ডিমৌৰ ৩৭ নং ৰাষ্ট্ৰীয় ঘাইপথত জব্দ কৰে।

আৰক্ষীয়ে ট্ৰাকখনৰ চালক ৰিংকু দাস নামৰ লোকজনক আটক কৰে আৰু লগতে উদ্ধাৰ কৰে লংকাৰ বিমল মণ্ডল নামৰ এজন লোকৰ নামত কাঠখিনি নিয়া বুলি উল্লেখ থকা এখন ৰচিদ।

লক্ষণীয় যে উদ্ধাৰ হোৱা ৰচিদত সাঁচিকাঠৰ পৰিৱৰ্তে ‘গ্ৰীণ নাট’ জাতীয় সামগ্ৰী বুলিহে উল্লেখ আছে।

শেহতীয়া খৱৰ অনুসৰি বিমল মণ্ডল এ আই ইউ ডি এফৰ সভাপতি বদৰুদ্দিন আজমলৰ আত্মীয় বুলি চালক ৰিংকু দাসে স্বীকাৰোক্তি দিছে।

ইতিমধ্য বন বিভাগৰ লোকে ঘটনাস্থলীত উপস্থিত হৈ চালকজনক সোধা পোচা অব্যাহত ৰাখিছে ।