উত্তৰ অসমৰ মাণ্ডলিক আয়ুক্ত ড০ এম অংগমুথুৰ ওদালগুৰি জিলা ভ্ৰমণ

উত্তৰ অসম মণ্ডল, তেজপুৰৰ মাণ্ডলিক আয়ুক্ত ড০ এম অংগমুথুৱে আজি ওদালগুৰি জিলা ভ্ৰমণ কৰি জিলাখনৰ ৰাষ্ট্ৰীয় নাগৰিক পঞ্জী উন্নয়ণৰ পুনৰীক্ষণ কৰাৰ লগতে জিলাখনৰ আইন-কানুনগত পৰিস্থিতিৰ বুজ লয়।
ওদালগুৰিৰ উপায়ুক্তৰ কাৰ্যালয়ৰ আলোচনাকক্ষত অনুষ্ঠিত এই আলোচনাচক্ৰত উপায়ুক্ত, আৰক্ষী অধীক্ষক, অতিৰিক্ত আয়ুক্ত আৰু সকলো ৰাজহ চক্ৰৰ চক্ৰ বিষয়াসকলৰ সৈতে মত বিনিময় কৰে।

ওদালগুৰিৰ উপায়ুক্ত দিলীপ কুমাৰ দাসে ৰাষ্ট্ৰীয় নাগৰিক পঞ্জী উন্নয়ণৰ সম্পৰ্কীয় শেহতীয়া কাম-কাজৰ খতিয়ান দাঙি ধৰে।

তেওঁ জনায় যে ৰাজহুৱাভাৱে খচৰাখন পৰীক্ষা কৰি থকা হৈছে আৰু ৰাষ্ট্ৰীয় নাগৰিক পঞ্জীৰ অন্তিম খচৰাত অন্তৰ্ভুক্ত নোহোৱাসকলৰ মনৰ পৰা অকাৰণ ভীতি নোহোৱা কৰিবলৈ তথ্য শিক্ষা আয়োগৰ (Information Education Commission)কাম-কাজ চলি আছে।

তেওঁ আৰু কয় যে জিলাখনত আইন-কানুনগত সমস্যাৰ সৃষ্টি হোৱা নাই আৰু জিলাখনত বৰ্তমান শান্তি বিৰাজ কৰি আছে। জনসাধাৰণৰ নিৰাপত্তাৰ দিশটোৰ ওপৰত চকু ৰাখিবলৈ যথেষ্ট নিৰাপত্তাৰ ব্যৱস্থা কৰা হৈছে।

মাণ্ডলিক আয়ুক্ত ড০ এম অংগমুথুৱে ৰাষ্ট্ৰীয় নাগৰিক পঞ্জী খচৰাৰ গুণগত মানত সন্তুষ্টি প্ৰকাশ কৰিছে।

জনসাধাৰণৰ সৈতে সহযোগ কৰি তথ্য শিক্ষা আয়োগৰ কাম-কাজ সুচাৰুৰূপে কৰি যাবলৈ তেও জিলা প্ৰশাসনৰ বিষয়াসকলক উৎসাহিত কৰে।

ৰাষ্ট্ৰীয় নাগৰিক পঞ্জী সম্পৰ্কত যাতে কোনো ভুল তথ্য প্ৰচাৰ হ’ব নোৱাৰে তাৰ সেই ক্ষেত্ৰত সাৱধান হ’বলৈ তেওঁ বিষয়াসকলক পৰামৰ্শ দিয়ে।

ড০ এম অংগমুথুৱে ৰাষ্ট্ৰীয় নাগৰিক পঞ্জী উন্নয়ণৰ প্ৰক্ৰিয়াত জড়িত বিষয়া কৰ্মচাৰীৰ কষ্টৰ শলাগ লয় আৰু নাগৰিক পঞ্জীৰ পৰৱৰ্তী প্ৰক্ৰিয়াতো আন্তৰিকতাৰে মনোনিৱেশ কৰিবলৈ আহ্বান জনায়।