এন আৰ চিৰ চূড়ান্ত খচৰা : ৩খন জিলাৰ বানপানীৰ অজুহাতত গোটেই অসমক বঞ্চিত নকৰিব, আহ্বান গগৈৰ

অসমৰ কেইখনমান জিলাত হোৱা বানপানীৰ বাবে অহা ৩০ জুনত এন আৰ চিৰ চূড়ান্ত খচৰা প্ৰকাশৰ ক্ষেত্ৰত এন আৰ চিৰ ৰাজ্যিক সমন্বয়ক প্ৰতীক হাজেলাই অনিশ্চয়তা প্ৰকাশ কৰাৰ পিছতে বিষয়টোক লৈ তীব্ৰ অসন্তুষ্টি প্ৰকাশ কৰি প্ৰাক্তন মুখ্য মন্ত্ৰী তৰুণ গগৈয়ে উচ্চতম ন্যায়ালয়ে নিৰ্ধাৰণ কৰা সময়সীমা অনুসৰিয়ে এন আৰ চিৰ চূড়ান্ত খচৰা প্ৰকাশৰ দাবী জনাইছে।

‘বৰাকৰ মাত্ৰ তিনিখন জিলাত বানপানী হোৱাৰ অজুহাত লৈ অহা ৩০ জুনত তালিকাখন ঘোষণা কৰিব নোৱাৰাৰ কাৰণ কি?’ গগৈৰ প্ৰশ্ন।

অসমৰ ৰাইজে বাট চাই থকা এন আৰ চিৰ চূড়ান্ত তালিকাৰ পৰা ‘বঞ্চিত’ নকৰিবলৈআহ্বান জনাই গগৈয়ে প্ৰশ্ন কৰে ‘হাইলাকান্দি, কৰিমগঞ্জক বাদ কৰি বাকীকেইখন জিলাৰ এন আৰ চি তালিকা ঘোষণা কৰাত আপত্তি কি?’

এন আৰ চিৰ সমন্বয়ক প্ৰতীক হাজেলা বিজেপি চৰকাৰৰ দ্বাৰা ‘মটিভে’টেড’ হোৱা বুলি আশংকা প্ৰকাশ কৰি প্ৰাক্তন মুখ্য মন্ত্ৰীজনে কয় যে যোৱা ৫ বছৰ ধৰি বিষয়াজনে  ‘অদক্ষতা’ প্ৰদৰ্শন কৰি আহিছে।

শুদ্ধ এন আৰ চি প্ৰস্তুত কৰাৰ ক্ষেত্ৰত বিজেপি চৰকাৰে একো বিশেষ ব্যৱস্থা হাতত লোৱা নাই বুলিও গগৈয়ে দাবী কৰে।

অসমৰ গৃহ বিভাগে কেন্দ্ৰৰ পৰা নিৰাপত্তা বাহিনীৰ ১৫০টা বেটেলিয়ান বিচৰাক লৈয়ো গগৈয়ে সন্দেহ প্ৰকাশ কৰে। ‘১৫০ টা বেটেলিয়ন কিয় বিচাৰিব লগীয়া পৰিস্থিতি হৈছে,’ গগৈৰ প্ৰশ্ন।

এন আৰ চিত যদি প্ৰকৃত ভাৰতীয়ৰ নাম নাথাকে, তেন্তে তেওঁলোক ক্ষুণ্ণ হোৱাটো স্বাভাৱিক বুলি মন্তব্য কৰি গগৈয়ে লগতে কয় ‘যদি বিদেশীৰ নাম নাথাকে, তাত আপত্তি কৰিবলগীয়া কি আছে?’