কাৰ্বি আংলঙৰ ডকমকা-কাণ্ডৰ বলি দুই যুৱকলৈ বড়োলেণ্ড বিশ্ববিদ্যালয়ত শ্ৰদ্ধাঞ্জলি অনুষ্ঠান

প্ৰকৃতিৰ অপৰূপ সৌন্দৰ্যৰ মাজত শব্দ-সংগীতৰ সন্ধানত গৈ কাৰ্বি আংলং জিলাৰ ডকমকাত চিৰদিনৰ বাবে হেৰাই গ’ল প্ৰতিভাৱান দুই অসম সন্তান অভিজিৎ নাথ আৰু নীলোৎপল দাস। সোপাধৰাৰ সন্দেহত এদল অন্ধবিশ্বাসী, উন্মত্ত লোকে দুয়োজনকে হানি-খুচি অতি নৃশংসভাৱে হত্যা কৰাৰ দৰে এই হৃদয় বিদাৰক ঘটনাৰ আজি প্ৰতিবাদ কৰা হয় বড়োলেণ্ড বিশ্ববিদ্যালয়ত।

উল্লেখযোগ্য যে কাৰ্বি আংলঙৰ ডকমকা থানাৰ অন্তৰ্গত পাণজুৰি গাৱঁত যুৱক দুজন বলি হৈছিল অন্ধবিশ্বাসৰ গ্ৰাসত থকা কিছুমান মানুহ। মন কৰিব লগীয়া যে জীৱনৰ শেষ উশাহলৈকে নিজকে অসমীয়া বুলি পৰিচয় দিয়াৰ পাছতো ঘাতকসকলৰ হৃদয় স্পৰ্শ নকৰিলে।

আজি কোকৰাঝাৰ চহৰৰ বড়োলেণ্ড বিশ্ববিদ্যালয়ৰ ছাত্ৰ একতা সভাৰ উদোগত আৰু কোকৰাঝাৰ আইন মহাবিদ্যালয় ছাত্ৰ একতা সভা, দা পীপলছ এইড আৰু বালাজান তিনালিস্থিত স্মাইল্চ্ ৱেলফেয়াৰ ছ’চাইটিৰ সহযোগত আজি ঘটনাৰ প্ৰতিবাদ কৰা হয় লগতে সন্ধিয়া ৬ বজাত এক মিনিট মৌন প্ৰাৰ্থনা, বন্তি প্ৰজ্বলনেৰে অভিজিৎ নাথ আৰু নীলোৎপল দাসক শ্ৰদ্ধাঞ্জলি জ্ঞাপন কৰে।

শ্ৰদ্ধাঞ্জলি অনুষ্ঠানত বড়োলেণ্ড বিশ্ববিদ্যালয়ৰ ছাত্র একতা সভাৰ সাধাৰণ সম্পাদক আখি বসুমতাৰীয়ে অপপ্ৰচাৰত যাতে কোনেও ভোল নাযায় আৰু কাৰ্বি আংলঙৰ ঘটনাক লৈ যাতে কোনো এটা জাতিক সাঙুৰি লৈ দোষ জাপি নিদিয়ে তাৰ বাবে সকলোকে আহ্বান জনায়।

এই নিৰ্মম ঘটনাটোৰ উচিত তদন্ত দাবী কৰাৰ লগতে দোষীক দৃষ্টান্তমূলক শাস্তি প্ৰদানৰো দাবী কৰে বিশ্ববিদ্যালয় ছাত্র একতা সভাই।