খহনীয়াত জাহ গ’ল নাম্বাৰপাৰা-বাংলাপাৰা সংযোগী মথাউৰি; ধোৱাচাঙত উঠিল মুখ্য মন্ত্ৰীৰ নিৰ্দেশ

মূখ্য মন্ত্ৰীৰ নিৰ্দেশেও ঢুকি নাপালে বঙাইগাঁও জিলাৰ নাম্বাৰপাৰা-বাংলাপাৰা গাঁও। বাৰিষাৰ পূৰ্বে সকলো মথাউৰি মেৰামতি, পুণৰ নিৰ্মান কৰিবলৈ মুখ্য মন্ত্ৰীয়ে সংশ্লিষ্ট বিভাগক কঠোৰ নিৰ্দেশ দিছিল যদিও নাম্বাৰপাৰা-বাংলাপাৰাত মুখ্য মন্ত্ৰীৰ নিৰ্দেশ ধোৱাচাঙত উঠা পৰিলক্ষিত হৈছে।

উল্লেখযোগ্য যে বঙাইগাঁও জিলাৰ ৩৪নং অভয়াপুৰী উত্তৰ বিধানসভা সমষ্টিৰ অন্তৰ্গত কোকিলাৰ নিকটৱৰ্তী নাম্বাৰপাৰা ৩য় খণ্ডৰ পৰা বাংলাপাৰা সংযোগী মথাউৰিটো সম্পূৰ্ণকৈ মানাহ নদীৰ খহনীয়াত জাহ যোৱাৰ ফলত যাতায়তৰ ক্ষেত্ৰত অঞ্চলটোৰ শ শ পথচাৰীৰ লগতে স্থানীয় স্কুল, কলেজৰ শিক্ষক-শিক্ষয়িত্ৰী তথা ছাত্ৰ-ছাত্ৰীয়ে যমৰ যাতনা ভুগিব লগা হৈছে।

এজাক বৰষুণ আহিলেই নাম্বাৰপাৰা ৩য় খণ্ড গাঁৱৰ পৰা বাংলাপাৰা, বাশবাৰী, লৈ যোৱা পথটো পুখুৰী সদৃশ হৈ পৰে। বাংলাপাৰাৰ পৰা নাম্বাৰপাৰালৈ যোৱা একমাত্ৰ মথাউৰি পথটো এনেদৰে ভাঙি ছিঙি যোৱা পিছতো পথটো মেৰামতিৰ কোনো ব্যৱস্থা গ্ৰহণ নকৰাত ভুক্তভোগী ৰাইজে জনপ্ৰতিনিধি তথা জিলা প্ৰশাসনক ধিক্কাৰ দিছে।

মাথাউৰি ভাঙি যোৱাত বাংলাপাৰা গাঁৱৰ লগতে সমগ্ৰ অঞ্চলটোৰ শ শ বিঘা খেতি মাটি, ঘৰ-দুৱাৰ তথা উত্তৰ-পশ্চিম এল পি স্কুল গৰাখহনীয়াৰ কৱলত পৰাৰ সম্ভাৱনাই ৰাইজৰ নিদ্ৰা হৰণ কৰাৰ বিপৰীতে জিলা প্ৰশাসন তথা স্থানীয় বিধায়ক আব্দুল হাই নাগৰি আৰু সাংসদ চিৰাজ উদ্দিন কূম্ভকৰ্ণ নিদ্ৰাত মগ্ন হৈ আছে বুলি ক্ষুব্ধ অঞ্চলস্থবাসীয়ে সাংবাদিকৰ আগত অভিযোগ কৰে।