খহনীয়াত জাহ যোৱাৰ উপক্ৰম পথ : বিচ্ছিন্ন হ’ব মাৰ্ঘেৰিটা-চাংলাঙৰ মাজত যোগাযোগ

অসম-অৰুণাচল প্ৰদেশ উভয় চৰকাৰৰ অকৰ্মণ্যতাৰ বাবেই শেহতীয়াকৈ অৰুণাচল প্ৰদেশৰ চাংলাং জিলাৰ সদৰ চাংলাঙৰ সৈতে তিনিচুকীয়া জিলাৰ মাৰ্ঘেৰিটাৰ যোগাযোগ শীঘ্ৰে বিচ্ছিন্ন হোৱাৰ দিশে আগবাঢ়িছে। উল্লেখ্য যে মাৰ্ঘেৰিটাৰ ৩৮ নং ৰাষ্ট্ৰীয় ঘাইপথৰ পৰা অৰুণাচল প্ৰদেশৰ চাংলাং সংযোগী ৪৫ কিলোমিটাৰ দৈৰ্ঘ্যৰ পথটোৰ বিধ্বস্ত অৱস্থাৰ ফলত শীঘ্ৰে যাতায়ত বন্ধ হোৱাৰ উপক্ৰম ঘটিছে।

আনহাতে, গুৰুত্বপূৰ্ণ পথটোৰ নামদাং চাহ বাগিছাৰ গফ্ল ফিল্ডৰ সমীপত সৃষ্টি হোৱা বিধ্বংসী খহনীয়াৰ ফলত যাতায়তত তীব্ৰ সমস্যাৰ সৃষ্টি হৈছে। উক্ত অংশত পথটোৰ প্ৰায় ৬০ শতাংশ খহনীয়াত জাহ  যোৱাত সম্প্ৰতি উক্ত পথেৰে অহাযোৱা কৰা যান-বাহন বিলাকে মৰণত শৰণ দি পাৰাপাৰ হ’বলগীয়াত পৰিছে।

চাংলাং জিলাৰ চৰকাৰী বিভাগসমূহৰ মুখ্য কাৰ্যালয় এই চাংলাঙলৈ এই পথেদি দৈনিক বহু লোকৰ আহ যাহ হয়। কিন্তু গুৰুত্বপূৰ্ণ পথটোৰ মেৰামতিৰ ক্ষেত্ৰত উভয় চৰকাৰৰ চূড়ান্ত অকৰ্মণ্যতাৰ বাবে অতি শীঘ্ৰে দুয়োখন ৰাজ্যৰ মাজত যোগাযোগ বিচ্ছিন্ন হৈ পৰাটো খাটাং হৈ পৰিছে। ভয়ংকৰ দুৰ্ঘটনাৰ সম্ভৱনা থকা পথটোৰ এই বিধ্বস্ত অংশ বিভাগীয় কৰ্তৃপক্ষই বালিৰ বস্তাৰে বিপদৰ সংকেত দিয়েই দায়িত্ব সামৰিছে।

সম্প্ৰতি পথটো জহি-খহি মাত্ৰ তিনি-চাৰি মিটাৰমানহে বাকী আছেগৈ। জানিব পৰা মতে, নৰ্থ-ইষ্ট কাউন্সিলৰ অধীনত থকা এই পথটোৰ মেৰামতিৰ নামত বিভাগীয় কৰ্তৃপক্ষই দীৰ্ঘদিন ধৰি কোনো আঁ‌চনি গ্ৰহণ কৰা নাই। শীঘ্ৰে পথটো মেৰামতিৰ ব্যৱস্থা গ্ৰহণ নকৰিলে দুই-এদিনৰ ভিতৰতে মাৰ্ঘেৰিটা-চাংলাঙৰ মাজত যোগাযোগ বিচ্ছিন্ন হোৱাটো নিশ্চিত হৈ পৰিছে।