শাৰীৰিক অক্ষমতাই হাৰ মনাব নোৱাৰা বিশ্বনাথৰ এজন অসাধাৰণ প্ৰতিভাৰ কিশোৰ

শাৰীৰিক অক্ষমতা কেতিয়াও নিজ প্ৰতিভা বিকাশৰ প্ৰতিবন্ধকতা হ’ব নোৱাৰে। তাকেই যেন প্ৰমাণ কৰাত ব্যস্ত বিশ্বনাথৰ এজন কিশোৰ। বিশ্বনাথৰ কেটলাত বাস কৰা কিশোৰজনে অহৰহ কঢ়িয়াই লৈ ফুৰিছে এজন সু নাগৰিক হোৱাৰ সপোন।

জন্মৰে পৰা দুয়োখন হাতৰ কিলাকুটিৰ পৰা তলৰ অংশ নথকা কিশোৰজনৰ নাম হৈছে ৰাজু কালান্দি। বৰগাং হাইস্কুলৰ দশম শ্ৰেণীত অধ্যয়নৰত ৰাজুৱে কেতিয়াও কাকো নিজৰ অক্ষমতাৰ অনুভৱ কৰিব দিয়া নাই।

প্ৰৱল ইচ্ছাশক্তি আৰু অপৰিসীম মনোবলৰ অধিকাৰী ৰাজুৱে অসম্ভৱকো সম্ভৱ কৰি তুলিছে। দুয়োখন হাতৰে তলৰ অংশ নাই যদিও কিশোৰজনৰ অসাধাৰণ প্ৰতিভাই সকলোকে বিষ্ময়কৰ কৰি তুলিছে। কিয়নো ৰাজুৱে লিখিব পাৰে ধুনীয়া হাতৰ আখৰ, চলাব পাৰে পিতৃৰ একমাত্ৰ উপাৰ্জনৰ থল মাৰুতি ভেন গাড়ী। ইয়াৰ উপৰি নিজে চাইকেল চলাই বজাৰ কৰা, চাইকেল মেৰামতি কৰাৰ লগতে সাধাৰণ মানুহৰ দৰে নিয়াৰিকে কৰি যায় সকলো কাম।

নানা প্ৰতিবন্ধকতাৰ মাজতো নিজকে সফল কৰি তুলিবলৈ বদ্ধপৰিকৰ ৰাজুৱে এতিয়া আগন্তুক হাইস্কুল শিক্ষান্ত পৰীক্ষাত নিজকে সাজু কৰি তোলাৰ বাবে ব্যস্ত। ইফালে দশমমান শ্ৰেণীত পঢ়ি থকা ৰাজুক লৈ সম্পূৰ্ণ আশাবাদী তেওঁ অধ্যয়নৰত বিদ্যালয়খনৰ শিক্ষকসকল।

উল্লেখ্য যে এই পৰ্যন্ত কোনো ধৰণৰ চৰকাৰী সাহায্য নোপোৱা প্ৰতিভাধৰ ৰাজুৱে পঢ়ি-শুনি সমাজত এটা ভাল স্থান পাবলৈ সক্ষম হ’ব বুলি পিতৃ নকুল কালান্দি আৰু মাতৃয়ে আশা প্ৰকাশ কৰিছে। স্থানীয় বিধায়ক তথা মন্ত্ৰী ৰঞ্জিৎ দত্তয়ো ভৱিষ্যতে ৰাজুক সকলো ধৰণৰ সহায়-সহযোগিতা আগবঢ়োৱাৰ প্ৰতিশ্ৰুতি প্ৰদান কৰিছে।