গণৰাজ্য দিৱসৰ পূৰ্বে মেঘালয় নিৰ্বাচনৰ প্ৰাৰ্থী তালিকা ঘোষণা কৰিব কংগ্ৰেছে
কংগ্ৰেছে গণৰাজ্য দিৱসৰ পূৰ্বে মেঘালয় বিধানসভা নিৰ্বাচনৰ প্ৰাৰ্থী তালিকা ঘোষণা কৰিব।
আজি গধূলি মুখ্যমন্ত্ৰী মুকুল চাংমাই সংবাদ মাধ্যমক জনাই যে কংগ্ৰেছৰ প্ৰদেশ নিৰ্বাচন সমিতি আৰু ইস্তাহাৰ সমিতিৰ বৈঠকৰ পিছতে গণৰাজ্য দিৱসৰ পূৰ্বেই প্ৰাৰ্থী বাচনি চূড়ান্ত কৰিব পৰাকৈ প্ৰদেশ কংগ্ৰেছে তেওঁলোকৰ ইচ্ছাৰ কথা কেন্দ্ৰীয় নেতৃত্বক জনাই দিছে।
জানিব পৰা মতে মুখ্যমন্ত্ৰী চাংমাই গৃ্হ সমষ্টি আমপাতিৰ উপৰি চংচাক সমষ্টিটো আসন্ন নিৰ্বাচনত প্ৰতিদ্বন্দ্বিতা কৰিব খোজাৰ সন্দৰ্ভতো বৈঠকত আলোচনা হৈছিল।
চাংমাই কয়, ‘ৰাজ্যিক পৰ্য্যায়ত দলে নিজৰ দায়িত্ব সম্পূৰ্ণ কৰিলে। এতিয়া নামসমূহ সৰ্বভাৰতীয় কংগ্ৰেছ সমিতিৰ বাচনি সমিতিক দাখিল কৰা হ’ব। দলৰ সভাপতি ৰাহুল গান্ধীৰ অনুমোদনমৰ্মে নামসমূহ ঘোষণা কৰা হ’ব।’
তেওঁ লগতে জনাই যে কেইটামান সমষ্টিৰ প্ৰাৰ্থীৰ নাম অহা ২৪ ৰপৰা ৪৮ ঘন্টাৰ ভিতৰত চূড়ান্ত কৰা হ’ব আৰু কংগ্ৰেছৰ বাচনি সমিতিলৈ প্ৰেৰণ কৰা হ’ব।
কংগ্ৰেছত যোগ দিব খোজা ৫ গৰাকী বিধায়ক সন্দৰ্ভত মুখ্যমন্ত্ৰীজনে কয় যে তেওঁলোকৰ প্ৰাৰ্থিত্ব সন্দৰ্ভত দলে পৰ্য্যৱেক্ষণ কৰি আছে।
আজি দিনটোৰ আগভাগত প্ৰায় ৯০ গৰাকী প্ৰাৰ্থিত্বপ্ৰয়াসীৰ আবেদন পত্ৰ প্ৰদেশ কংগ্ৰেছৰ নিৰ্বাচন সমিতিয়ে পৰীক্ষা কৰে।
প্ৰদেশ কংগ্ৰেছৰ সভাপতি চেলেষ্টিন লিংডোক অধ্যক্ষ হিচাপে লৈ গঠিত নিৰ্বাচন সমিতিখনত অন্যান্য সদস্যৰ লগতে আছে মুখ্যমন্ত্ৰী চাংমা, শ্বিলঙৰ সাংসদ তথা প্ৰদেশ কংগ্ৰেছৰ কাৰ্য্যকৰী সভাপতি ৱিনছেন্ট এইচ পালা আৰু প্ৰবীন নেতা তথা প্ৰদেশ কংগ্ৰেছৰ উপদেষ্টা ডি ডি লাপাং।