গুৱাহাটীৰ দক্ষিণগাঁৱত চিআইডিৰ অভিযানত তিনি লক্ষাধিক টকাৰ কফ ছিৰাপসহ এজন ড্ৰাগছ ব্যৱসায়ীক গ্ৰেপ্তাৰ
সোমবাৰে সন্ধিয়া চি আই ডিৰ এটা অভিযানকাৰী দলে মহানগৰীৰ কাহিলিপাৰা অঞ্চলৰ দক্ষিণগাঁও তিনিআলিত এক অভিযান চলাই ১৬ টা কাৰ্টনৰ পৰা ১৫৮০টা প্ৰ’ডাইল-চি ক’ফ ছিৰাপ জব্দ কৰাৰ লগতে নগাঁৱৰ আব্দুল ৰফিক (৩৭) নামৰ এজন ড্ৰাগছ ব্যৱসায়ীকো গ্ৰেপ্তাৰ কৰে।
জব্দকৃত কফ ছিৰাপখিনিৰ বজাৰ মূল্য প্ৰায় ৩.১৬ লাখ টকা হ’ব বুলি চি আই ডিয়ে জানিবলৈ দিয়ে।
প্ৰাপ্ত তথ্য মতে, সোমবাৰে বিয়লি প্ৰায় ৪.৩০ বজাত এক গোপন সূত্ৰৰ পম খেদি চি আই ডিৰ উপ-আৰক্ষী অধীক্ষক দি দত্তৰ নেতৃত্বত দক্ষিণগাঁও তিনিআলিৰ সূৰুযা বেগমৰ বাসগৃহত অভিযান চলায়। এই অভিযানকালত চি আই ডিৰ অভিযানকাৰী দলটোৱে ১৬টা কফ ছিৰাপভৰ্তি কাৰ্টন উদ্ধাৰ কৰাৰ লগতে এ এছ-০২-৫৮৭০ নম্বৰৰ এখন ছুইফ্ট ডিজায়াৰ জব্দ কৰে।
ড্ৰাগছ ব্যৱসায়ীজনে দক্ষিণগাঁও তিনিআলিৰ সূৰুযা বেগমৰ ঘৰত ভাৰাতীয়া হিচাপে আশ্ৰয় লৈ নিষিদ্ধ ড্ৰাগছৰ বেহা চলাই আহিছিল। গুৱাহাটী মহানগৰীকে ধৰি নগাঁও আৰু ৰাজ্যৰ বিভিন্ন প্ৰান্তত ব্যৱসায়ীজনে ড্ৰাগছ সৰবৰাহ কৰি অহাৰ খবৰ লাভ কৰাৰ ভিত্তিতেই কালি অভিযান চলাই উৎখাট কৰে নিচাজাতীয় দ্ৰব্যৰ ঘাটি।
ইয়াৰ উপৰি চি আই ডিয়ে ড্ৰাগছ ব্যৱসায়ী ৰফিকৰ ভাৰাঘৰৰ পৰা ৬টা কাৰ্টনৰ পৰা ৫৮০টা প্ৰ’ডাইল-চি কফ ছিৰাপৰ বটল উদ্ধাৰ কৰে। লগতে ব্যৱসায়ীজনৰ দক্ষিণগাঁওস্থিত ভাৰাঘৰৰ সন্মুখত ৰৈ থকা বাহনৰ পৰা চি আই ডিয়ে ১০টা কফ ছীৰাপভৰ্তি কাৰ্টন উদ্ধাৰ কৰে আৰু কাৰ্টনকেইটাৰ পৰা চি আই ডিয়ে ১০০০টা প্ৰ’ডাইল-চিৰ কফ ছিৰাপৰ বটল উদ্ধাৰ কৰিবলৈ সক্ষম হয়।
উল্লেখ্য যে ড্ৰাগছ ব্যৱসায়ী ৰফিকে প্ৰাৰম্ভিক জেৰাত প্ৰকাশ কৰা অনুসৰি উক্ত বাহনখনেৰে কফ ছিৰাপখিনি ব্যৱসায়ীজনে নগাঁৱৰ আমিনপট্টীলৈ নিয়াৰ পৰিকল্পনা কৰিছিল।