গোলাঘাটৰ আঠখেলীয়া নামঘৰৰ দুৰ্নীতিৰ তদন্তৰ বাবে বাহৰ পাতিছে চি আই ডিৰ দলে; গোচৰীয়াৰ সাক্ষ্য গ্ৰহণ

ৰাজ্যৰ বৈষ্ণৱ ধৰ্মপ্ৰাণ ৰাইজৰ মাজত বিশেষ শ্ৰদ্ধা-ভক্তিৰ স্থল গোলাঘাট জিলাৰ ঐতিহ্যমণ্ডিত শ্ৰীশ্ৰী আঠখেলীয়া নামঘৰত হোৱা কোটিটকীয়া নিৰ্মাণ কেলেংকাৰিৰ তদন্ত কৰি থকা চি আই ডিৰ এটা দলে তদন্ত প্ৰক্ৰিয়া আগুৱাই নিয়াৰ বাবে আজিৰ পৰা বাহৰ পাতিছে।

উল্লেখযোগ্য যে নিৰ্মাণ কামৰ বাবে বিগত কংগ্ৰেছ চৰকাৰৰ দিনত অনুমোদিত ধনৰ ব্যাপক অপ ব্যৱহাৰ হোৱাৰ অভিযোগ উত্থাপন হৈছিল। নামঘৰ পুনৰ নিৰ্মাণ আৰু সাংস্কৃতিক ভৱন নিৰ্মাণৰ বাবে দিয়া প্ৰায় ২ কোটি টকাৰ পুঁজিৰ ব্যাপক অপব্যৱহাৰ আৰু আৱণ্টিত পুঁজি আত্মসাৎ কৰা সন্দৰ্ভত ২০১৩ আৰু ২০১৪ বৰ্ষত ঘিলাধাৰী আৰক্ষী থানাত পঞ্জীয়ন হৈছিল পাঁচটাকৈ গোচৰ। কিন্তু অসম আৰক্ষীৰ তদন্তই বিশেষ অগ্ৰগতি লাভ নকৰাত আদালতে আৰক্ষীৰ বাহিৰে আন সংস্থাৰ দ্বাৰা উপযুক্ত তদন্তৰ নিৰ্দেশ দিয়ে।

তাৰ পিছৰ পৰাই দুৰ্নীতিটোৰ তদন্ত চি আই ডিয়ে কৰি আছে। ইয়াৰ পূৰ্বেও চি আই ডিয়ে নামঘৰত উপস্থিত হৈ বিভিন্ন নিৰ্মাণস্থান পৰিদৰ্শন কৰাৰ লগতে স্থানীয় লোকৰ জবানবন্দি লৈছিল।

আজি চি আই ডিৰ বিষয়া শিৱৰাম মৰাঙৰ নেতৃত্বৰ এটা দলে অভিযুক্ত লোকসকলক মাতি নি সোধা-পোছা কৰে। গোলাঘাট জিলা আৰক্ষী অধীক্ষকৰ অতিথিশালাত গোচৰীয়া সকলৰ পৰা সাক্ষ্য গ্ৰহণ কৰে চি আই ডিৰ দলটোৱে।
কাইলৈ পুৱাৰ ভাগতে চি আই ডিৰ দলটো আঠখেলীয়া নামঘৰ চৌহদত উপস্থিত হোৱাৰ সম্ভাৱনা। চি আই ডিৰ দলটোৱে নামঘৰ পৰিচালনা সমিতিৰ বিষয়ববীয়াৰ পৰাও সাক্ষ্য গ্ৰহণ কৰাৰ লগতে যাবতীয় নথিপত্ৰসমূহ পৰীক্ষা কৰিব।

মন কৰিব লগীয়া যে এই কেলেংকাৰিৰ বাদ-বিবাদক লৈ কেইবছৰ মান পূৰ্বে নামঘৰৰ ভিতৰতে মাৰপিটৰ ঘটনাও হৈছিল। কাজিয়াই এনে ৰূপ পাইছিল যে দাৰ আঘাতত পূৰ্বৰ সমিতিৰ সম্পাদকজনৰ হাতৰ আঙুলিও কটা গৈছিল। তাৰ পিছতে নতুন নিৰ্মাণ সমিতি গঠন কৰা হৈছিল।