গোষ্ঠী বিদ্বেষকামীলৈ শক্তিশালী বাৰ্তাৰে নীলোৎপল-অভিজিতৰ পিতৃ-মাতৃৰ কাষত কাৰ্বি ছাত্ৰ সন্থা

ডকমকা কাণ্ডৰ আলম লৈ গোষ্ঠী বিদ্বেষ বিয়পাব খোজাসকললৈ শক্তিশালী বাৰ্তা প্ৰেৰণ কৰি আজি ১৪ জুনত নীলোৎপল আৰু অভিজিতৰ ঘৰত আহি পিতৃ-মাতৃৰ কাষত থিয় দিলেহি কাৰ্বি ছাত্ৰ সন্থাই।

বৃহস্পতিবাৰে কাৰ্বি ছাত্ৰ সন্থাৰ সভাপতিসহ এটা প্ৰতিনিধি দলে সদৌ অসম ছাত্ৰ সন্থা আৰু ২৮ টা জনগোষ্ঠীয় সংগঠনৰ নেতৃবৰ্গৰ সৈতে নীলোৎপল দাস আৰু অভিজিৎ নাথৰ ঘৰলৈ গৈ পুত্ৰশোকত দগ্ধ হৈ থকা দুয়োজন যুৱকৰ পিতৃ-মাতৃৰ শোকৰ সমভাগী হয়।

উল্লেখ্য যে, নীলোৎপল আৰু অভিজিতৰ পিতৃ-মাতৃৰ সৈতে কাৰ্বি ছাত্ৰ সন্থাৰ সভাপতি চেমচন টেৰণৰ লগতে সংগঠনটোৰ প্ৰতিনিধিৰ  সাক্ষাৎ আছিল অতি সৌহাৰ্দ্যপূৰ্ণ। সাক্ষাৎকালত পাহাৰীয়া জিলাখনৰ পৰা অন্ধবিশ্বাস আৰু কু-সংস্কাৰ দূৰ কৰাৰ বাবে কাৰ্বি ছাত্ৰ সন্থাক অগ্ৰণী ভূমিকা লোৱাৰ আহ্বান জনায় দুয়োগৰাকী যুৱকৰ শোকসন্তপ্ত পিতৃ-মাতৃয়ে।

নীলোৎপল-অভিজিতৰ পিতৃ-মাতৃয়ে ক’লে, ‘অপৰাধীৰ কোনো জাতি-ধৰ্ম-ভাষা নাই। অপৰাধী কেৱল অপৰাধীয়েই। হত্যাকাৰীকেইজনৰ বিৰুদ্ধে হওক কঠোৰ ব্যৱস্থা’। তেওঁলোকে লগতে ঘটনাৰ ফাষ্টট্ৰেক আদালতত বিচাৰ কৰি দোষীক উচিত শাস্তি নিদিলে নীলোৎপল-অভিজিতৰ আত্মাই শান্তি নাপাব বুলি কৈ অভিযুক্ত কেইজনক কেৱল গ্ৰেপ্তাৰ কৰিলেই সকলো যেন পাহৰি নাযায় তাৰ বাবে সকলোকে আহ্বান জনায়। লগতে খিলঞ্জীয়া জাতি-জনগোষ্ঠীৰ মাজত সদ্ভাৱ আৰু সম্প্ৰীতি অক্ষুন্ন ৰখাৰ বাবেও অনুৰোধ জনালে তেওঁলোকে।

ইয়াৰ উপৰিও এনে ঘটনা যেন দুনাই সংঘটিত নহয় তাৰ বাবে সকলো শ্ৰেণীৰ লোকক শিক্ষিত, কু-সংস্কাৰমুক্ত কৰি এখন শান্তিপূৰ্ণ আৰু সুন্দৰ সমাজ গঢ়াৰ ক্ষেত্ৰত পদক্ষেপ ল’বলৈ সদৌ অসম ছাত্ৰ সন্থা, ২৮ জনগোষ্ঠীয় সংগঠন আৰু চৰকাৰলৈ দুয়োগৰাকী যুৱকৰ পিতৃ-মাতৃয়ে আহ্বান জনায়।

বৃহস্পতিবাৰে নীলোৎপল দাস আৰু অভিজিৎ নাথৰ ঘৰত উপস্থিত হৈ আছুসহ জনগোষ্ঠীয় সংগঠনসমুহৰ প্ৰতিনিধিসকলে মৃতকলৈ গভীৰ শ্ৰদ্ধাঞ্জলি জনায়।

শোকসন্তপ্ত পৰিয়াল দুটাক সাক্ষাতৰ পাছত আছুৰ মুখ্য উপদেষ্টা ড০ সমুজ্জ্বল কুমাৰ ভট্টাচাৰ্যই কয়, ‘এই ঘটনাটোত অসমীয়াই অসমীয়াক হত্যা কৰাৰ দৰে হ’ল। হত্যাকাণ্ডত জড়িতসকলক দৃষ্টান্তমূলক শাস্তি দিয়ক যাতে ভৱিষ্যতে কোনোৱেই এনে জঘন্য কামত লিপ্ত হ’বলৈ সাহস গোটাব নোৱাৰে’।