চাৰিখন শিক্ষা প্ৰতিষ্ঠান তথা শিক্ষাবিদ দেৱেন দত্তলৈ অসম সাহিত্য সভাৰ বঁটা

অসমীয়া ভাষাৰ প্ৰতিষ্ঠা-সংৰক্ষণ-সংবৰ্ধনৰ স্বীকৃতি স্বৰুপে অসম সাহিত্য সভায়ে ৰাজ্যখনৰ চাৰিখন শৈক্ষিক প্ৰতিষ্ঠান তথা শিক্ষাবিদ দেৱেন দত্তক বঁটা প্ৰদানৰ বাবে নিৰ্বাচন কৰিছে।

কটন মহাবিদ্যালয়ৰ ইংৰাজী বিভাগৰ প্ৰাক্তন অধ্যাপক বিশিষ্ট শিক্ষাবিদ দেৱেন দত্তক গংগাগোবিন্দ ফুকন বঁটা প্ৰদান কৰা হ’ব। দত্তই অসমীয়া ভাষাৰ উপৰত দুখনকৈ মূল্যবান গ্ৰন্থ ৰচনা কৰিছে।

উচ্চ শিক্ষা প্ৰতিষ্ঠান তেজপুৰ কেন্দ্ৰীয় বিশ্ববিদ্যালয় আৰু নলবাৰীৰ মহেন্দ্ৰ নাৰায়ণ চৌধুৰী বালিকা মহাবিদ্যালয়লৈ সাহিত্য সভাৰ শ্বহীদ ৰঞ্জিত বৰপূজাৰী বঁটা আগবঢ়োৱা হৈছে।

নুনমাটিৰ অসম জাতীয় বিদ্যালয়লৈ শ্বহীদ মোজাম্মিল হক বঁটা আৰু মায়ঙৰ নিজ তেতেলিয়া প্ৰাথমিক বিদ্যালয়লৈ সভাৰ শ্বহীদ সূৰ্য বৰা বঁটা।

৩ ফেব্ৰুৱাৰিত অসম সাহিত্য সভাৰ ৭৪তম অধিবেশনৰ দ্বিতীয় মুকলি সভাত উক্ত বঁটা সমূহ প্ৰদান কৰা হ’ব।

১ৰ পৰা ৪ ফেব্ৰুৱাৰিলৈ দ্বিবাৰ্ষিক অধিবেশনখন তিনিচুকিয়া আৰু অৰুণাচল প্ৰদেশৰ চাংলাং জিলাত অনুষ্ঠিত কৰা হ’ব।

উল্লেখযোগ্য পূৰ্বতে সাহিত্য সভাই চাংলাং জিলাৰ বৰডুমছাত অধিবেশন অনুষ্ঠিত কৰাৰ সিদ্ধান্ত লৈছিল যদিও বুঢ়িদিহীংবাসীৰ অনুৰোধত সভাই বুঢ়িদিহীং অঞ্চলতো দ্বিবাৰ্ষিক অধিবেশনখন অনুষ্ঠিত কৰাৰ সিদ্ধান্ত লয়।