চাৰিদুৱাৰৰ ১৫ নং ৰাষ্ট্ৰীয় ঘাইপথত যাত্ৰীবাহী বাছ দুৰ্ঘটনাগ্ৰস্ত, ২৫জন আহত

আজি পুৱা শোণিতপুৰ জিলাৰ চাৰিদুৱাৰ আৰক্ষী থানাৰ অন্তৰ্গত ১৫নং ৰাষ্ট্ৰীয় ঘাইপথৰ জীয়া ভৰলীত সংঘটিত এক পথ দুৰ্ঘটনাত অসম ৰাজ্যিক পৰিবহণ নিগমৰ এখন যাত্ৰীবাহী বাছ ৰাষ্টাত বাগৰি পৰাত ২৫ জনতকৈ অধিক যাত্ৰী আহত হৈছে।

গুৱাহাটীৰ পৰা লখিমপুৰ অভিমুখে গৈ থকা দুৰ্ঘটনাত পতিত এ এছ ২০ ১৬/১৬ নম্বৰৰ বাছখনে বহু বেছি যাত্ৰী কঢ়িয়াই নিছিল বুলি প্ৰত্যক্ষদৰ্শীয়ে জানিবলৈ দিয়ে।

দুৰ্ঘটনাটোৰ খবৰ লাভ কৰি আৰক্ষী ঘটনাস্থলিলৈ ৰাওনা হৈ স্থানীয় লোকৰ সহযোগত আহত যাত্ৰীসকলক প্ৰাথমিক চিকিৎসাৰ বাবে ৩০ খন বিছনাযুক্ত উত্তৰ জামুগুৰি চিকিৎসালয়লৈ প্ৰেৰণ কৰে।

অৱশ্যে পিছত তেওঁলোকক উনত্ত চিকিৎসাৰ বাবে তেজপুৰ চিকিৎসা মহাবিদ্যালয় হাস্পতাল আৰু কনকলতা অসামৰিক চিকিৎসালয়লৈ পঠিওৱা হয়।

আনহাতে টুমুকিস্থিত তেজপুৰ চিকিৎসা মহাবিদ্যলয় হাস্পতালত ভৰ্তি হৈ থকা ৪ গৰাকী যাত্ৰীৰ অৱস্থা সংকটজনক বুলি জানিব পৰা গৈছে।