চৰাইদেউত হাইস্কুল শিক্ষান্ত পৰীক্ষাৰ মাজতে সংগীতানুষ্ঠান আয়োজনকলৈ প্ৰতিক্ৰিয়া

চৰাইদেউ জিলাৰ বৰহাটৰ বৰপথাৰত হাইস্কুল শিক্ষান্ত পৰীক্ষা চলি থকাৰ মাজতে উপায়ুক্তৰ পৃষ্ঠপোষকতাতে সংগীতানুষ্ঠান অনুষ্ঠিত কৰাৰ দৰে সংঘটিত হৈছে এক নাভূত নাশ্ৰুত ঘটনা ৷

প্ৰাপ্ত তথ্য মতে চৰাইদেউ জিলাৰ বৰহাটৰ বৰপথাৰত দিচং নৈৰ পাৰত ৰিভাৰিন নামৰ এটা সংস্থাই এক সংগীতানুষ্ঠান কৰে। য’ত নীল আকাশকে ধৰি বহু কেইগৰাকী শিল্পীয়ে সংগীতানুষ্ঠানটোত গীত পৰিৱেশন কৰে। যাৰ ফলত অঞ্চলটোৰ হাইস্কুল শিক্ষান্ত পৰীক্ষাৰ পৰীক্ষাৰ্থীসকলৰ ব্যাপক সমস্যাৰ সন্মুখীন হ’ব লগীয় হয়।

উচ্চস্বৰৰ শব্দ যন্ত্ৰ ব্যৱহাৰ কৰি সংগীতানুষ্ঠান অনুষ্ঠিত কৰাৰ ফলত অঞ্চলটোৰ পৰীক্ষাৰ্থী সকল নিজ গৃহ এৰি দূৰৈত থকা আত্মীয়ৰ ঘৰত নিশা কটাই পৰীক্ষাত অৱতীৰ্ণ হ’ব লগা হৈছে।

উল্লেখযোগ্য যে চৰাইদেউ জিলা উপায়ুক্ত বিবেকানন্দ ফুকনে হাইস্কুল শিক্ষান্ত পৰীক্ষাৰ দৰে ছাত্ৰ জীৱনৰ গুৰুত্বপূৰ্ণ এটা পৰীক্ষা চলি থকাৰ মাজেত এনেদৰে উচ্চ স্তৰত শব্দ যন্ত্ৰ ব্যৱহাৰ কৰি সংগীতানুষ্ঠান কৰিবলৈ অনুমতি প্ৰদান কৰাটো আশ্চৰ্যজনক।

আনহাতে আন একাংশ স্থানীয় ৰাইজে প্ৰকাশ কৰা মতে সোণাৰিৰ বিধায়ক তপন গগৈৰ ঘনিষ্ঠ একাংশ যুৱকে এই সংগীতানুষ্ঠান আওজন কৰাৰ বাবে উপায়ুক্ত গৰাকীয়ে অনুমতি প্ৰদান কৰাৰ লগতে নিজেও অনুষ্ঠান উপভোগ কৰে। যাৰ ফলত এই সমগ্ৰ ঘটনাকলৈ জিলাখনত সৰৱ চৰ্চা চলাৰ লগতে এই কাণ্ডক সচেতন মহলে গৰিহণা দিছে।