ছিকিম চৰকাৰে বাচনি কৰি উলিয়ালে ৰাজ্যৰ ৫০ গৰাকী মেধাৱী ছাত্ৰ-ছাত্ৰী

মুখ্য মন্ত্ৰী মেধাৱী স্কলাৰশ্বীপ, ২০১৮ৰ অধীনত ছাত্ৰ বৃত্তি প্ৰদানৰ বাবে বাচনি কৰা হৈছে ছিকিমৰ ৫০ গৰাকী মেধাৱী ছাত্ৰ-ছাত্ৰীক । ছাত্ৰ-ছাত্ৰীসকলে যাতে দেশৰ উচ্চ শিক্ষানুষ্ঠান সমূহত উচ্চ শিক্ষা গ্ৰহণ কৰিব পাৰে তাৰ প্ৰতি লক্ষ্য ৰাখিয়েই ৰাজ্য চৰকাৰে এই বিশেষ ছাত্ৰ বৃত্তিৰ প্ৰৱৰ্তন কৰিছিল।

ছিকিমৰ চাৰিওখন জিলাৰে চৰকাৰী বিদ্যালয়ৰ ছাত্ৰ-ছাত্ৰী সকলৰ মাজত এক বিশেষ পৰীক্ষা অনুষ্ঠিত হয়। আৰু সেই পৰীক্ষাৰ ফলাফলৰ যোগেদি ৰাজ্য চৰকাৰে ৫০ গৰাকী মেধাৱী ছাত্ৰ-ছাত্ৰীক নিৰ্বাচিত কৰি ছাত্ৰ বৃত্তি প্ৰদান কৰে। ছাত্ৰ বৃত্তিৰ বাবে এই বিশেষ পৰীক্ষাতো ২০১৭ চনৰ ডিচেম্বৰ মাহতে অনুষ্ঠিত কৰিছিল মানৱ সম্পদ উন্নয়নে।

ছাত্ৰ বৃত্তি পাবলৈ সক্ষম হোৱা ৫০গৰাকী ছাত্ৰ-ছাত্ৰীক সম্পূৰ্ণ মেধা আৰু বাচনি প্ৰক্ৰিয়াৰ মাজেৰে নিৰ্বাচিত কৰা হৈছে বুলি জানিবলৈ দিছে। নিৰ্বাচিত ৫০গৰাকীৰ ভিতৰত ১০ জন ছাত্ৰ-ছাত্ৰীয়ে ৰাজ্যৰ বাহিৰত গৈ শীৰ্ষ শিক্ষানুষ্ঠানত অধ্যয়ন কৰিব পাৰিব।

গোৱালিয়ৰৰ এছচিইণ্ডিয়া কন্যা বিদ্যালয় আৰু এছচিইণ্ডিয়া স্কুল, মধ্যপ্ৰদেশৰ ডেৰাডুন চিগালী হিলছ ইণ্টাৰনেশ্যনেল একাডেমী, ডেৰাডুনৰ দিল্লী পাব্লিক স্কুল, আৰিয়ান স্কুল আৰু হিমাচল প্ৰদেশৰ পিনেগ্ৰোভ স্কুলত শীৰ্ষ ১০ গৰাকী ছাত্ৰ-ছাত্ৰীয়ে উচ্চ শিক্ষাৰ বাবে সুবিধা লাভ কৰিব।

ইপিনে বাকী ৪০ গৰাকী বৃত্তি প্ৰাপ্ত ছাত্ৰ-ছাত্ৰীয়ে ৰাজ্যখনৰে শীৰ্ষ বিদ্যালয় সমূহত পঢ়াৰ সুযোগ পাব। বিদ্যালয় কেইখন হ’ল, গেংটকৰ টাছি নামগ্যিয়াল একাডেমী, নামছি পাব্লিক স্কিল, মালবাছিৰ ডন বস্কো স্কুল, পাকিয়ঙৰ ছেইণ্ট জাভিয়াৰছ স্কুল, মৰ্টমৰ ছেইণ্ট জোচেফ’ছ স্কুল আৰু গেইজিঙৰ ছেইণ্ট মাৰিজ স্কুল।

ছিকিমৰ ছাত্ৰ-ছাত্ৰীসকলক উৎসাহ তথা সহায়ৰ উদ্দেশ্যে ৰাজ্য চৰকাৰে ২০১০ চনৰে পৰা মুখ্য মন্ত্ৰী মেধাৱী স্কলাৰশ্বীপৰ অধীনত ৫০ গৰাকী ছাত্ৰ-ছাত্ৰীক ছাত্ৰ বৃত্তি প্ৰদান কৰি আহিছে।

ছিকিম চৰকাৰী বিদ্যালয়ত প্ৰথমৰ পৰা পঞ্চম শ্ৰেণীলৈ পঢ়ি থকা ১১-১২ বছৰীয়া ছাত্ৰ-ছাত্ৰীয়েহে এই বৃত্তিৰ বাবে বাচনি পৰীক্ষাত অংশগ্ৰহণ কৰিব পাৰে।