ডিমা হাচাও জিলাত ভুৱা স্থায়ী বাসিন্দাৰ প্ৰমাণপত্ৰৰ ৰমৰমীয়া বেহা

বিভিন্ন কামত স্থায়ী বাসিন্দাৰ প্ৰমাণপত্ৰ প্ৰয়োজন হোৱা পৰিস্থিতিটোৰ সুযোগ লৈ হাফলঙত এচাম দুষ্ট চক্ৰই চলাই আছে স্থায়ী বাসিন্দাৰ প্ৰমাণপত্ৰৰ অবৈধ বেহা। জিলাখনৰ বিভিন্ন ঠাইত এতিয়া পয়োভৰ ঘটিছে নকল পি আৰ চি। জানিব পৰামতে ট্ৰেড লাইচেন্স, চাকৰিৰ আৱেদন আদি কামৰ বাবে ডিমা হাচাও জিলাত স্থায়ীভাৱে বসবাস কৰা ব্যক্তি, যাৰ নামত বা উপৰিপুৰুষৰ নামত ভূমিপট্টা আছে, তেনে ব্যক্তিৰ নামত উত্তৰ কাছাৰ  পাৰ্বত্য স্বায়ত্ত শাসিত পৰিষদৰ ভূমি আৰু ৰাজহ বিভাগে স্থায়ী বাসিন্দাৰ প্ৰমাণপত্ৰ বা পি আৰ চি দিয়ে।

কিন্তু এই প্ৰমাণপত্ৰ পাবৰ যোগ্যতা নথকা লোকে এইদৰে পি আৰ চি লাভ কৰিব নোৱৰাত ভুৱা প্ৰমাণ পত্ৰকে সংগ্ৰহ কৰা দেখা গৈছে। ইয়াৰে সুযোগ লৈ নকল পি আৰ চি যোগান ধৰা এটা দুষ্ট চক্ৰই গা কৰি উঠিছে। বিশেষকৈ পি আৰ চি অবিহনে ট্রেইড লাইচেন্স দিয়া নহ’ব বুলি কোৱাৰ পাছত সক্ৰিয় হৈ পৰিছে নকল পি আৰ চি প্ৰস্তুতকাৰী চক্ৰটো। যাৰ ফলত অধিক ধনৰ বিনিময়ত নকল পি আৰ চি দিয়াসকলৰ বজাৰ এতিয়া ৰমৰমীয়া।

অৱশ্যে এই তথ্য  উত্তৰ কাছাৰ পাৰ্বত্য স্বায়ত্তশাসিত পৰিষদৰ সংশ্লিষ্ট কৰ্তৃপক্ষৰ দৃষ্টিগোচৰ হোৱাৰ লগে লগে নকল পি আৰ চি বিৰোধী অভিযান আৰম্ভ হৈছে। সেইদৰে পি আৰ চি ভেৰিফিকেইশ্যনৰ পাছতহে গ্ৰহণ কৰাৰ বাবে জিলাৰ বিভিন্ন বিভাগক জাননী জাৰি কৰা হৈছে।

জানিব পৰামতে এই কাৰ্য্যব্যৱস্থাৰ ফলত উমৰাংচুৰ প্ৰেম কুমাৰ ৰায় নামৰ এজন যুৱকৰ পি আৰ চি নকল বুলি প্ৰমাণিত হোৱাৰ লগে লগে হাফলং আৰক্ষীক বিষয়টো অবগত কৰি বিহিত ব্যৱস্থা লোৱাৰ কাৰণে এজাহাৰ দিয়া হয়।

উত্তৰ কাছাৰ পাৰ্বত্য স্বায়ত্তশাসিত পৰিষদৰ ভূমি আৰু ৰাজহ বিভাগৰ অতিৰিক্ত সচিব ছাইন্দেছ আৰদাওৱে জনাইছে যে নকল পি আৰ চি জব্দ কৰাৰ কাৰণে ভূমি আৰু ৰাজহ বিভাগ প্ৰস্তুত হৈ আছে। তেওঁ এনে নকল পি আৰ চি লোৱাৰ পৰা ৰাইজক সতৰ্ক কৰি দিয়ে। অন্যথা পি আৰ চি প্ৰস্তুতকাৰীৰ পৰা ধন দি অবৈধ পি আৰ চি লোৱা ব্যক্তিৰ বিৰুদ্ধে আইনী ব্যৱস্থা লোৱা হ’ব বুলি জনাইছে বিষয়াজনে।

লগতে নকল পি আৰ চি বনোৱা চক্ৰ উৎখাতৰ কাৰণে কৰ্তৃপক্ষ সাজু হৈ আছে বুলিও তেওঁ জনায়।