তিনিদিনীয়া দিচাং-ব্ৰহ্মপুত্ৰ উৎসৱৰ সামৰণি

যোৱা ৬ জানুৱাৰীৰ পৰা তিনিদিনীয়া কাৰ্যসূচীৰে ড০ ভূপেন হাজৰিকা আৰু গণশিল্পী বিক্ৰম সিং য়েইন সমন্বয় ক্ষেত্ৰত অনুষ্ঠিত হোৱা দিচাং-ব্ৰহ্মপুত্ৰ উৎসৱৰ সফলভাৱে সামৰণি পৰিছে। শিৱসাগৰ চহৰৰ পৰা ১০ কিলোমিটাৰ আঁতৰৰ শিৱসাগৰৰ জিলাৰ নৈপৰীয়া পৰ্যটন ক্ষেত্ৰ আকৰ্ষণীয় দিচাংমুখক জনপ্ৰিয় তথা পৰিচিত কৰি তোলাৰ লক্ষ্যৰে দিচাং-ব্ৰহ্মপুত্ৰ ইক’ ট্যুৰিজম ছচাইটিয়ে বৃহত্তৰ দিচাংমুখৰ ৰাইজ, শিৱসাগৰ জিলা প্ৰশাসন আৰু মিচিং স্বায়ত্ত পৰিষদৰ সহযোগত এই দিচাং-ব্ৰহ্মপুত্ৰ উৎসৱৰ আয়োজন কৰিছিল।

প্ৰথম দিনৰ ৰাতিপুৱাৰ কাৰ্যসূচীত আছিল  গছ পুলি ৰোপন, পতাকা উত্তোলন, স্মৃতি তৰ্পণ ইত্যাদি। ইয়াৰ পিছতে ৰাতিপুৱা ৯-৩০ বজাত উৎসৱস্থলী উদ্বোধন কৰে মিচিং স্বায়ত্ত পৰিষদৰ অধ্যক্ষ সুনীল পেগুৱে। উদ্বোধনী ভাষণত তেওঁ অসমৰ এখন পৰ্যটন স্থলী দিচাংমুখৰ উন্নয়নৰ বাবে পৰিষদে বহুকেইটা আদৰ্শ আঁচনি গ্ৰহণ কৰিছে বুলি উল্লেখ কৰে। ইয়াৰে এক অংশ হিচাপে ৩০ লাখ টকা ব্যয় সাপেক্ষে অনিল পাংগিং  স্মৃতি ভৱনটো নিৰ্মাণ কৰা বুলি তেওঁ কয়।

৬০ লাখ টকা ব্যয় সাপেক্ষে ড০ ভূপেন হাজৰিকা আৰু গণ শিল্পী বিক্ৰম সিং য়েইন সোঁৱৰণি যাদুঘৰ নিৰ্মাণ আৰু দিচাং-ব্ৰহ্মপুত্ৰ উৎসৱৰ এটা স্থায়ী প্ৰেক্ষাগৃহ নিৰ্মাণৰ  কৰাৰ এক প্ৰস্তাৱ গ্ৰহণ কৰা হৈছে। তেওঁ লগতে কয় যে দিচাংমুখে বহু সমস্যাৰ সন্মুখীন হৈ আহিছে আৰু এটা বাছ আস্থান অতি আৱশ্যক হৈ পৰিছে। তেওঁ দিচাং-ব্ৰহ্মপুত্ৰ উৎসৱৰ স্থায়ী ভৱনৰ বাবে মিচিং পৰিষদৰ পৰা ৫ লাখ টকা আগবঢ়োৱাৰ প্ৰতিশ্ৰুতি দিয়ে।

ইয়াৰ পিছতে শিৱসাগৰৰ অতিৰিক্ত আৰক্ষী অধীক্ষক প্ৰফুল্ল সোণোৱালে তিনিদিনীয়া কাৰ্যসূচীৰ বৃহৎ দিচাং-ব্ৰহ্মপুত্ৰ উৎসৱখনি আনুষ্ঠানিকভাৱে উদ্বোধন কৰে। আবেলি বিশিষ্ট কবি, স্তম্ভলেখক অনিল পাংগিঙে দিচাংমুখ খেলপথাৰত অনুষ্ঠিত ক্ৰীড়া অনুষ্ঠানৰ উদ্বোধন কৰে।

দ্বিতীয় দিনাৰ সন্ধিয়া ৰনজনী কান্ত পাংগিঙে সম্পাদনা কৰা স্মৃতিগ্ৰন্থ বৰনৈ-দিচাং উন্মোচন কৰে বিশিষ্ট স্তম্ভলেখক ছামছুল বাৰিকে। অনুষ্ঠানত উপস্থিত থাকে অভ্যৰ্থনা সমিতিৰ সভাপতি পুনাৰাম মিলি, সাংবাদিক কুমাৰ অভিজিৎ দুৱৰা ,সামাজিক কৰ্মী থানুৰাম মিলি, কুমাল পাংগিং, অৰ্জুন গোৱালা ইত্যাদি।

ইয়াৰ পিছতে দিচাংমুখ প্ৰেছ ক্লাৱৰ উদ্যোগত এখন কবি সন্মিলন অনুষ্ঠিত হয়। শিৱসাগৰ জিলা সাহিত্য সভাৰ নৱ নিৰ্বাচিত সম্পাদক বিনোৱা টায়ে কবি সন্মিলনখন উদ্বোধন কৰে। বিশিষ্ট কবি গংগা মোহন মিলি, প্ৰেম গগৈ, অনিল পাংগিং, প্ৰশান্ত কুমাৰ নাথকে ধৰি প্ৰায় ১৬ গৰাকী কবিয়ে কবিতা পাঠ কৰে।

এই অনুষ্ঠানতে অকনিৰ কথা শিল্পী ইমৰান শ্বাহ, প্ৰজ্ঞাৰ সাধক ড০ বিৰিঞ্চি কুমাৰ বৰুৱা, মুকুট বিহীন সম্ৰাট অকনিৰ বকুল বনৰ কবি আনন্দ চন্দ্ৰ বৰুৱা আদিকে ধৰি কেইবাখনো গ্ৰন্থ উন্মোচন কৰা হয়।

আনহাতে, ৰাতিপুৱাৰ ভাগত কেশৱ দলে আৰু কেছান দলে সোঁৱৰণি হাফ মাৰাথন দৌৰ প্ৰতিযোগিতা অনুষ্ঠিত হয়। শিৱসাগৰৰ আৰক্ষী অধীক্ষক সুবোধ সোণোৱালে প্ৰতিযোগিতাখন আনুষ্ঠানিকভাৱে মুকলি কৰে।

সামৰণিৰ দিনা এক বৰ্ণাঢ্য সাংস্কৃতিক সন্ধিয়াৰ আয়োজন কৰা হয়।