তৃতীয় সংখ্যক নুমলীগড় মাৰাথন প্ৰতিযোগিতাত কেনিয়াৰ খেলুৱৈৰ আধিপত্য
নুমলীগড় ৰিফাইনেৰী লিমিটেডে আয়োজন কৰি অহা তৃতীয় সংখ্যক নুমলীগড় মাৰাথন ২০১৮ৰ দেওবাৰে নুমলীগড় টাউনশ্বীপত সফলতাৰে অনুষ্ঠিত হৈ যায়। ‘ৰান টু কীপ ফীট’ শীৰ্ষক মন্ত্ৰৰে আয়োজিত মাৰাথনত ৰিফাইনেৰী অঞ্চলবাসী, এনআৰএল কৰ্মচাৰীৰ পৰিয়ালৰ লগতে দেশ তথা ৰাজ্যৰ মাৰাথন খেলুৱৈৰ উপৰি কেনিয়া আৰু নেপালৰ পৰা অহা প্ৰতিযোগীয়েও অংশগ্ৰহণ কৰা পৰিলক্ষিত হয়।
উল্লেখ্য যে প্ৰতিযোগিতাখন তিনিটা শাখাত অনুষ্ঠিত কৰা হোৱা বুলি আয়োজকে আমাক জানিবলৈ দিয়ে। পুৰুষ আৰু মহিলা দুয়োটা শাখাৰ বাবে হাফ মাৰাথন ২১.১ কিলোমিটাৰ, এনডিউৰেন্সত ১০ কিলোমিটাৰ আৰু ড্ৰিম ৰানত ৫ কিলোমিটাৰ দৈৰ্ঘৰ লক্ষ্য স্থান নিৰ্ধাৰণ কৰি দিয়ে।
এই তিনিটা শাখাৰ মাৰাথন প্ৰতিযোগিতা সমূহ উদ্বোধন কৰে এনআৰএলৰ এমডি এছ কে বৰুৱা, এনআৰএলৰ ইন্ডিপেনডেণ্ট ডিৰেক্টৰ স্নেহ লতা কুমাৰ আৰু এনআৰএলৰ ডিৰেক্টৰ(টেকনিকেল) বি জে ফুকনে।
লক্ষ্যণীয় যে ২১.১ কিলোমিটাৰ প্ৰতিযোগিতাৰ পুৰুষৰ শাখাত প্ৰথম কেনিয়াৰ জেমছ নিডি ন্যইৰা(১.১৩.২৬ মিণিটত) আৰু মেঘালয়ৰ তীৰ্থ পুনে(১.১৫.৪০ মিণিট) দ্বিতীয় স্থান দখল কৰিবলৈ সক্ষম হৈছে।
আনহাতে মহিলাৰ ২১.১ কিলোমিটাৰত কেনিয়াৰ চেচিলিহ ৱাংগুই ৱাৰুটুমোই(১.৩৯.১৩মিণিটত) প্ৰথম স্থান দখল কৰিছে।
ইয়াৰ উপৰি পুৰুষৰ ১০ কিলোমিটাৰ শাখাত প্ৰথম হৈছে মেঘালয়ৰ ষ্টিলিন জিৰৱা(৩২.৩২মিণিট) আৰু মহিলাৰ প্ৰথম হৈছে শ্বিলঙৰ ডাটেইবেংকিনমাউ মাৰউইন(৪০.২৫মিণিট)।
তদুপৰি পুৰুষৰ ৫ কিলোমিটাৰ শাখাত গোলাঘাটৰ জয়মংগল ওৰাঙে(২৩.২২.১৩ মিণিট) প্ৰথম আৰু গোলাঘাটৰে সীমা বেগমে(৩১.৫৭.১০মিণিট) মহিলাৰ শাখাত প্ৰথম স্থান দখল কৰিছে।
প্ৰতিযোগিতাৰ শেষত ডিপিএছ নুমলীগড় খেলপথাৰত আয়োজিত বঁটা বিতৰণী অনুষ্ঠানত খেলুৱৈ সকলক পুৰস্কাৰ সমূহ প্ৰদান কৰা হয়। আনহাতে বঁটা বিতৰণী অনুষ্ঠানতে আয়োজক সন্থাই ঘোষণা কৰে যে আগন্তুক বৰ্ষত নুমলীগড় মাৰাথন প্ৰতিযোগিতাখন সম্পূৰ্ণ পূৰ্ণ মাৰাথন প্ৰতিযোগিতালৈ ৰূপান্তৰিত কৰা হ’ব।
স্মৰ্তব্য যে সামৰণি অনুষ্ঠানত অৰ্জুন বঁটা প্ৰাপ্ত তথা এছিয়ান গেমছৰ সোণৰ পদক বিজয়ী ভোগেশ্বৰ বৰুৱা আৰু আৰ্ম ৰেষ্টলিং চেম্পিয়ন যবি মেথিউজো উপস্থিত আছিল। তেওঁলোক দুয়োজনে ভাষণ প্ৰসংগত খেলুৱৈ সকলৰ মনোবল বৃদ্ধি কৰাৰ উদ্দেশ্যে নিজৰ নিজৰ অভিজ্ঞতা সমূহ খেলুৱৈ সকলৰ ব্যক্ত কৰে।