নগাঁৱৰ জাজৰি উচ্চতৰ মাধ্যমিক বিদ্যালয়ত ১২ দিনীয়া শিক্ষক প্ৰশিক্ষণ কাৰ্যসূচী আৰম্ভ

‘যিয়ে অজ্ঞানতাৰ বিনাশ কৰি জ্ঞানৰ পোহৰেৰে সকলোকে আলোকিত কৰে তেৱেঁই হৈছে গুৰু বা শিক্ষক। শিক্ষক হৈছে এটা জাতিৰ স্ৰষ্টা। শিশুসকলক দেশৰ ভৱিষ্যত সু-নাগৰিক ৰূপে গঢ়ি তোলাত শিক্ষকৰ ভূমিকা অপৰিসীম’ এই মন্তব্য শিক্ষাবিদ তথা জাজৰি উচ্চতৰ মাধ্যমিক বিদ্যালয়ৰ প্ৰাক্তন অধ্যক্ষ হিতেশ ডেকাৰ।

আজি নগাঁও জিলাৰ ঐতিহ্যমণ্ডিত জাজৰি উচ্চতৰ মাধ্যমিক বিদ্যালয়ত ৰাষ্ট্ৰীয় মুক্ত বিদ্যালয় প্ৰতিষ্ঠানৰ ডি এল ই ডি পাঠ্যক্ৰমৰ অধীনৰ ১২ দিনীয়া শিক্ষক প্ৰশিক্ষণ কৰ্মসূচীৰ শুভাৰম্ভণি অনুষ্ঠানত ভাগ লৈ এনেদৰে কয় শিক্ষাবিদগৰাকীয়ে।

উক্ত অনুষ্ঠানত জাজৰি উচ্চতৰ মাধ্যমিক বিদ্যালয়ৰ অধ্যক্ষ তথা এন আই অ’ এছৰ জাজৰি অধ্যয়ন কেন্দ্ৰৰ সমন্বয়ক মঞ্জুল কটকী, বিদ্যালয় পৰিচালনা সমিতিৰ সভাপতি জয়ন্ত শৰ্মা, সমাজকৰ্মী নৰেণ ডেকা, শিক্ষক ইমদাদুৰ ৰহমান উপস্থিত থাকি আদৰ্শ শিক্ষকৰ গুণৰাজি আৰু শিক্ষক প্ৰশিক্ষণৰ প্ৰয়োজনীয়তাৰ ওপৰত বহুমূলীয়া বক্তব্য প্ৰদান কৰে।

উক্ত অনুষ্ঠানত অঞ্চলটোৰ কেইবাগৰাকী বিশিষ্ট ব্যক্তিৰ লগতে প্ৰায় দুই শতাধিক শিক্ষক প্ৰশিক্ষাৰ্থী উপস্থিত থাকে।