নাগৰিকত্ব বিধেয়ক গৃহীত হ’লে এন আৰ চি পেলনীয়া কাগজত পৰিণত হ’ব : তৰুণ গগৈ

বিজেপিয়ে বিচৰা ধৰণে নাগৰিকত্ব (সংশোধনী) বিধেয়ক ২০১৬’ গৃহীত হ’লে এন আৰ চি পেলনীয়া কাগজত পৰিণত হ’ব। এই মন্তব্য কৰিছে ৰাজ্যৰ প্ৰাক্তন মুখ্যমন্ত্ৰী তথা জ্যেষ্ঠ কংগ্ৰেছ নেতা তৰুণ গগৈয়ে।

বৃহস্পতিবাৰে গুৱাহাটীত এখন সংবাদমেলত গগৈয়ে কয় যে বিধেয়কখন গৃহীত হ’লে ২০১৪ চনৰ ৩১ ডিচেম্বৰ পৰ্যন্ত অসমত প্ৰৱেশ কৰা সকলো হিন্দু বাংলাদেশীয়ে নাগৰিকত্ব পাব। সেয়ে হ’লে এন আৰ চি উন্নীতকৰণৰ কোনো অৰ্থই নাথাকিব।

বিজেপিৰ সভাপতি অমিত শ্বাহক সমালোচনা কৰি প্ৰাক্তন মুখ্যমন্ত্ৰীগৰাকীয়ে কয় যে এন আৰ চি অসম চুক্তিৰ ‘আত্মা’ বুলি শ্বাহে কৈছে যদিও তেওঁলোকৰ আত্মা নাগৰিকত্ব (সংশোধনী) বিধেয়কতহে আছে।

আনহাতে, এন আৰ চিৰ ৰাজ্যিক সমন্বয়ক প্ৰতীক হাজেলা আৰু ভাৰতৰ মহাপঞ্জীয়ক শৈলেশক উচ্চতম ন্যায়ালয়ে ভৰ্ৎসনা কৰা প্ৰসংগত প্ৰতিক্ৰিয়া ব্যক্ত কৰি গগৈয়ে কয় যে তেওঁলোকে যে ভালকৈ কাম কৰা নাছিল সেয়া প্ৰমাণিত হৈছে।

চূড়ান্ত খচৰা প্ৰস্তুতিত যথেষ্ট ভুল হোৱা বুলি যি অভিযোগ উত্থাপন হৈছে সেয়া যে অসত্য নহয় সেয়াও প্ৰমাণিত হৈছে। হাজেলাই উচ্চতম ন্যায়ালয়ৰ নিৰ্দেশো সঠিকভাৱে পালন কৰা নাই, যাৰ বাবে ন্যায়ালয়ে তেওঁক দায়িত্ব আৰু কৰ্তব্য সোঁৱৰাই দিবলগা হৈছে।

প্ৰাক্তন মুখ্যমন্ত্ৰীগৰাকীয়ে লগতে স্থানীয় পৰ্যায়ত সন্দেহযুক্ত নাগৰিকক চিনাক্ত কৰাৰ বাবে কংগ্ৰেছ চৰকাৰে প্ৰস্তাৱ কৰা থানা পৰ্যায়ৰ কমিটী গঠনৰ প্ৰাসংগিকতা পুনৰ দোহাৰে। ন্যায়ালয়ে এই প্ৰস্তাৱ নাকচ কৰিছে যদিও ৰাজ্যিক পৰ্যায়ৰ ব্যৱস্থাৰে স্থানীয় পৰ্যায়ত সন্দেহযুক্ত লোকৰ সন্ধান পোৱাটো সম্ভৱ নহয় বুলি উল্লেখ কৰি গগৈয়ে কয় যে ন্যায়ালয়ক বিষয়টো পুনৰ বিবেচনা কৰাৰ বাবে কংগ্ৰেছে অনুৰোধ জনাব পাৰে। এই বিষয়ত তেওঁ দলত আলোচনা কৰিব বুলি জানিব দিয়ে।

আনহাতে, বৰ্তমান বিজেপি নেতৃত্বাধীন ৰাজ্য চৰকাৰৰ মিত্ৰজোঁটৰ অংশীদাৰ অসম গণ পৰিষদ দলক সমালোচনা কৰি গগৈয়ে কয়, ‘’ অগপয়ো দুমুখীয়া ভূমিকা পালন কৰিছে। অগপই নাগৰিকত্ব (সংশোধনী) বিধেয়ক ২০১৬’ৰ বিৰোধিতা কৰে আৰু অসম চুক্তি ৰূপায়নৰ বাবে দাবী কৰে। কিন্তু তেওঁলোকে চৰকাৰত থকা গেৰুৱা দলটোৰ সৈতে মিত্ৰতা ভংগ কৰিব নিবিচাৰে। এইটো মোৰ বাবে সাঁথৰ।‘’