নুমলীগড় শোধনাগাৰৰ নগৰাঞ্চলত পিঞ্জৰাবদ্ধ নাহৰফুটুকী বাঘ

নুমলীগড়ৰ শোধনাগাৰৰ নগৰাঞ্চলত বন বিভাগে পতা এটা পিঞ্জৰাত আজি পুৱতি নিশা এটি মাইকী নাহৰফুটুকী বাঘ পিঞ্জৰাবদ্ধ হয় ৷

দীর্ঘদিন ধৰি নগৰাঞ্চলৰ ফুটুকানিত বাঘজনীয়ে বিচৰণ কৰি ফুৰা দেখিছিল নগৰাঞ্চলৰ বাসিন্দাই ৷

নুমলীগড় শোধনাগাৰ কৰ্তৃপক্ষই বাঘজনী কৰায়ত্ব কৰিবৰ বাবে বন বিভাগক জনাইছিল ৷ গোলাঘাট সংমণ্ডলৰ নুমলীগড় খণ্ড বন কাৰ্যালয়ে বাঘজনী কৰায়ত্ব কৰাৰ বাবে উক্ত স্থানত লোৰ পিঞ্জৰা স্থাপন কৰে ৷

বন বিভাগে স্থাপন কৰা এই পিঞ্জৰাতে আজি পুৱতি নিশা আৱদ্ধ হয় বাঘজনী ৷ সম্প্ৰতি পিঞ্জৰাবদ্ধ বাঘজনীক নামবৰ অভয়াৰণ্যত মুকলি কৰি দিয়াৰ বাবে পৰিকল্পনা কৰা হৈছে ৷

উল্লেখ্য যে নুমলীগড় শোধনাগাৰৰ নগৰাঞ্চলৰ গাতে লাগি আছে দেওপাহাৰ প্ৰস্তাৱিত সংৰক্ষিত বনাঞ্চল ৷ এই বনাঞ্চল নাহৰফুটুকী বাঘৰ অন্যতম আৱাসস্থলী ৷

নুমলীগড় শোধনাগাৰৰ নগৰাঞ্চলৰ সম্প্ৰসাৰণ আৰু বিভিন্ন কাৰ্যকলাপে নাহৰফুটুকী বাঘৰ বিচৰণ শেষতীয়াকৈ বিপন্ন কৰি তুলিছে ৷ ইয়াৰ বাবে অকল নাহৰফুটুকী বাঘেই নহয় বনাঞ্চলৰ হাতীৰ জাকৰ বিচৰণতো বাধাৰ সৃষ্টি হৈ আহিছে।

যোৱা ১৩ মাৰ্চত গোলাঘাট জিলা প্ৰশাসনে বন বিভাগৰ সহযোগত নুমলীগড় শোধনাগাৰে নগৰাঞ্চলৰ নামত বেদখল কৰি দেওপাহাৰ সংৰক্ষিত বনাঞ্চলত নিৰ্মাণ কৰা পকী দেৱাল ভাঙি এক হেক্টৰ ভূমি বেদখল মুক্ত কৰে ৷