পঞ্চম সংখ্যক উত্তৰ-পূব কাৰাটে চেম্পিয়নশ্বিপত পদকৰ শীৰ্ষত অৰুণাচল
অৰুণাচলৰ ইটানগৰৰ নিওকাম লাপাং খেল পথাৰত পঞ্চম সংখ্যক উত্তৰ-পূব কাৰাটে চেম্পিয়নশ্বিপৰ দেওবাৰে জাকজমকতাৰে শুভাৰম্ভণি হোৱাৰ পিছত সোমবাৰে সামৰণি পৰা প্ৰতিযোগিতাখনত ঘৰুৱা দল অৰুণাচল প্ৰদেশে ৬৮টা পদকেৰে তালিকাৰ শীৰ্ষস্থান দখল কৰে। ঘৰুৱা দলটো মুঠ ৪৫টা সোণ, ১২টা ৰূপ আৰু ১১টা ব্ৰঞ্জৰ পদক পাবলৈ সক্ষম হয়। ইয়াৰ উপৰি অসমে ১৮টা সোণ, ২৯টা ৰূপ আৰু ১৪টা ব্ৰঞ্জেৰে দ্বিতীয় আৰু উত্তৰ-পূবৰ শক্তিশালী ৰাজ্য মণিপুৰে মাত্ৰ ৭টা ৰূপ আৰু ১৪টা ব্ৰঞ্জৰে তালিকাৰ তৃতীয় স্থানত থাকে।
আনহাতে পদক পোৱা বাকী ৰাজ্য তথা দলকেইটা হ’ল মিজোৰাম ২টা সোণ, ৭টা ৰূপ আৰু ১৪টা ব্ৰঞ্জ, অসম ৰাইফলছ ৩টা সোণ, ১টা ৰূপ আৰু ১টা ব্ৰঞ্জ, নাগালেণ্ড ১টা সোণ আৰু ৬টা ব্ৰঞ্জ, চিকিম ৪টা ৰূপ আৰু ১৭টা ব্ৰঞ্জ, দাৰ্জিলিং গোৰ্খা কাৰাটে এছ’চিয়েশ্যন ২টা ৰূপ আৰু ৭টা ব্ৰঞ্জ, অৰুণাচল প্ৰদেশ পুলিচ স্প’ৰ্টছ কণ্ট্ৰল ব’ৰ্ডে ২টা ৰূপ আৰু ৩টা ব্ৰঞ্জেৰে প্ৰতিযোগিতাৰ অন্ত পেলায়। এই প্ৰতিযোগিতাখনত ৪৭০গৰাকী খেলুৱৈ সহিতে বিভাগীয় লোকে অংশগ্ৰহণ কৰিছিল।
প্ৰতিযোগিতাৰ সামৰণি অনুষ্ঠানত ক্ৰীড়া আৰু যুৱ বিভাগৰ যুটীয়া সচিৱ মিগে কামকিয়ে অৰুণাচল কাৰাটে এছ’চিয়েশ্যন সভাপতি তিখা তাৰা আৰু কাৰিকৰী ডিৰেক্টৰ এছ দেৱেন শৰ্মাক অনুষ্ঠানটো সাফল্যমণ্ডিত কৰি তোলা বাবে ধন্যবাদ জ্ঞাপন কৰে। তাৰা আৰু শৰ্মাই যোৱা ৩০ বছৰত কাৰাটে খেলক উন্নতিৰ শিখৰত লৈ যোৱাৰ বাবে যথেষ্ট কষ্ট কৰা বুলিও কামকিয়ে কয়। ‘৩০ বছৰ আগতে ৰোৱা গছে এতিয়া ফল দিয়া আৰম্ভ কৰিছে’ বুলি তাৎপৰ্যসূচক মন্তব্য কৰে।
অৰুণাচল প্ৰদেশৰ ক্ৰীড়াৰ অধ্যক্ষ বাৰমাং টাগোৱে খেলখনৰ সফল পৰিসমাপ্তিৰ বাবে আয়োজক তথা প্ৰত্যেক খেলুৱৈকে ধন্যবাদ জনায়।