পাঠশালাত বাইকত অহা দুৰ্বৃত্তই কাঢ়ি নিলে ১.২২ লাখ টকা

ৰাজ্যৰ আইন শৃখলা ব্যৱস্থাক বুঢ়া আঙুলি দেখুৱাই বৰপেটা জিলাৰ পাঠশালাত দিনদুপৰতে বৃহস্পতিবাৰে সংঘটিত হ’ল ডকাইতিৰ ঘটনা। পাঠশালাৰ ৩১ নং ৰাষ্ট্ৰীয় ঘাইপথৰ পৰা বাইকত অহা অস্ত্ৰধাৰী ডকাইতৰ দলে বন্দুক দেখুৱাই বেংকত কৰ্মৰত এজন কৰ্মচাৰীৰ পৰা কাঢ়ি নিলে ১.২২ লাখ টকা ।

ঘটনাৰ বিবৰণী অনুসৰি ভুক্তভোগী পাঠশালাৰ বন্ধন বেংকত কৰ্মৰত নলবাৰী জিলাৰ ৩৪ বৰ্ষীয় ৰমেশ কলিতাই আমিৰ হুছেইন নামৰ আন এজন সহযোগীৰ লগত গ্ৰাহকৰ পৰা আদায় দিবলগীয়া ধন সংগ্ৰহ কৰি পাটাছাৰকুছিৰ পৰা পাঠশালালৈ নিজৰ বাইকত উভতি আহি থকা অৱস্থাতে বাইকত অহা দুজন দুৰ্বৃত্তই বাট আগচি ধৰি ১.২২ লাখ টকা কাঢ়ি লৈ যায়। সূত্ৰৰ পৰা স্থানীয় সংবাদ দাতাই জানিব পৰা মতে অপৰাধ সংঘটিত কৰা দুৰ্বৃত্ত দুজনে হেলমেট পৰিধান কৰি আহিছিল।

ইতিমধ্যে ঘটনা সন্দৰ্ভত ৰমেশ কলিতাই পাটাছাৰকুছি আৰক্ষী চকীত এক অভিযোগ দাখিল কৰিছে। অভিযোগ দাখিলৰ পিছতেই আৰক্ষীয়ে  প্ৰাথমিক অনুসন্ধানৰ কাম আৰম্ভ কৰিছে। স্থানীয় ৰাইজে অভিযোগ কৰা অনুসৰি পাঠশালা চহৰ আৰু ইয়াৰ সমীপৱৰ্তী অঞ্চল সমূহত প্ৰয়োজনীয় টহলদাৰী আৰক্ষী অভাৱৰ বাবেই এনে ঘটনা সংঘটিত হৈ আহিছে।