পুনৰ উজলিল অসমৰ হিমা দাস: এইবাৰ ২০০ মিটাৰত স্বৰ্ণ

অসমৰ এথলেটিকছৰ নতুন আশা তথা ভাৰতৰ সপোন হিমা দাস পুনৰ উজলি উঠিল ৰাষ্ট্ৰীয় প্ৰেক্ষাপটত। বৃহস্পতিবাৰে ফেডাৰেশ্যন কাপ এথলেটিকছত পুনৰ স্বৰ্ণ পদক অৰ্জন কৰি প্ৰতিপন্ন কৰিলে তেওঁৰ প্ৰতিভা।

পঞ্জাৱৰ পাটিয়ালাত অনুষ্ঠিত হোৱা প্ৰতিযোগিতাখনৰ ২০০ মিটাৰ দৌৰত কালি স্বৰ্ণ পদক অৰ্জন কৰে হিমা দাসে। উল্লেখ্য যে মহিলাৰ ৪০০ মিটাৰত স্বৰ্ণ জয় কৰি ইতিমধ্যে কমনৱেল্থ গেমছত খেলাৰ বাবে অৰ্হতা লাভ কৰা হিমাই পুনৰ এবাৰ গৌৰৱান্বিত কৰিলে সমগ্ৰ ৰাজ্যবাসীকে।

কালি অনুষ্ঠিত হোৱা ২০০ মিটাৰ ফাইনেলত মাত্ৰ ২৩.৩৭ ছেকেণ্ড সময়তে নিৰ্দিষ্ট দূৰত্ব অতিক্ৰম কৰি হিমাই সোণৰ পদক অৰ্জন কৰিবলৈ সক্ষম হয়। লক্ষ্যণীয় যে দ্বিতীয় স্থান পোৱা কৰ্ণাটকৰ পিজে স্নেহাই নিৰ্দিষ্ট দূৰত্ব অতিক্ৰম কৰাৰ বাবে হিমাতকৈ ১.১০ ছেকেণ্ড সময় বেছি লয়।

আনহাতে এই শাখাতে উৰিষ্যাৰ জৌনা মুৰ্মুৱে তৃতীয় স্থান অধিকাৰ কৰাৰ বাবে সময় লয় ২৪.৬৪ ছেকেণ্ড।

উল্লেখ্য যে পাটিয়ালাত অনুষ্ঠিত এই প্ৰতিযোগিতাখনত হিমাৰ চমকপ্ৰদ উত্থানে সমগ্ৰ ভাৰতৰ এথলেটিক ক্ষেত্ৰখনকে শিহৰিত কৰিছে। ইতিমধ্যে বিভিন্ন ৰাষ্ট্ৰীয় বাতৰি কাকতে হিমাৰ হৰিণীৰ লেখীয়া দৌৰক প্ৰশংসা কৰি ভাৰতত এগৰাকী নতুন তাৰকা জন্ম হোৱা বুলি প্ৰকাশ কৰিছে।

আনহাতে কালি অনুষ্ঠিত হোৱা মহিলাৰ শ্বটপুট শাখাত তুনলাই নাৰ্জাৰীয়ে ষষ্ঠ স্থান অধিকাৰ কৰে।