পেমা খাণ্ডুৱে পূব মাণ্ডলিক আয়ুক্ত কাৰ্যালয় উদ্বোধন কৰি উৎসৰ্গা কৰিলে পূব অৰুণাচলবাসীলৈ
মঙলবাৰে অৰুণাচল প্ৰদেশৰ মুখ্য মন্ত্ৰী পেমা খাণ্ডুৱে পূব মাণ্ডলিক আয়ুক্ত কাৰ্যালয় উদ্বোধন কৰি পূব অৰুণাচলবাসীৰ বাবে উৎসৰ্গা কৰিলে।এই কাৰ্যালয়ৰ স্থাপনৰ ফলত ৰাইজ আৰু চৰকাৰৰ সম্পৰ্ক অধিক শক্তিশালী হ’ব বুলি পেমা খাণ্ডুৱে মন্তব্য কৰে। মুখ্য মন্ত্ৰীয়ে কাৰ্যালয়টো উদ্বোধন কৰি ৰাইজৰ প্ৰতি দায়বদ্ধতা তথা ৰাজনৈতিক প্ৰতিশ্ৰুতি পালন কৰিলে।
ইয়াৰ উপৰি খাণ্ডুৱে মঙলবাৰে মুখ্য অভিযন্তা(পি ডব্লিউ ডি), মুখ্য অভিযন্তা(পি এইচ ডি আৰু ডব্লিউ এছ) আৰু তত্বাৱধায়ক অভিযন্তা( আৰ ডব্লিউ ডি) বিভাগৰো শুভ উদ্বোধন কৰে।
পূব মাণ্ডলিক আয়ুক্ত কাৰ্যালয়ে পূব অৰুণাচলৰ মুঠ ১১ খন জিলাৰ প্ৰশাসনিক কাম-কাজ নিয়ন্ত্ৰিত কৰিব। জিলাকেইখন হ’ল পূব চিয়াং, চিয়াং, উজনি চিয়াং, নামনি দিবাং উপত্যকা, আনজ্ব, টিৰাপ আৰু লংদিং।
ৰাইজক সম্বোধন কৰি কয় যে পূব মাণ্ডলিক আয়ুক্ত কাৰ্যালয় আৰু মুখ্য অভিযন্তা কাৰ্যালয়ৰ অধীনত বুনিয়াদী উন্নয়নৰ বাবে পৰৱৰ্তী বাজেটত ধন মোকলাই দিয়াৰ প্ৰতিশ্ৰুতি প্ৰদান কৰে।
তদুপৰি তেওঁ কয় যে ৰাজ্য চৰকাৰে প্ৰদেশখনত প্ৰশাসনিক কাম-কাজ বিকেন্দ্ৰীকৰণ কৰাৰ প্ৰচেষ্টা অব্যাহত ৰাখিছে।
‘মুখ্য অভিযন্তা(পি ডব্লিউ ডি), মুখ্য অভিযন্তা(পি এইচ ডি আৰু ডব্লিউ এছ) আৰু তত্বাৱধায়ক অভিযন্তা( আৰ ডব্লিউ ডি)ৰ কাৰ্যালয় ইটানগৰৰ লগতে নামছাইৰ পৰা পৰিচালিত হ’ব। লগতে পূব অৰুণাচলৰ ১১ খন জিলাৰ সকলো চৰকাৰী কাম-কাজ পূব মাণ্ডলিক আয়ুক্ত কাৰ্যালয়ৰ পৰা নিয়ন্ত্ৰিত হ’ব’, মুখ্য মন্ত্ৰী খাণ্ডুৱে এইদৰে জনায়।
উল্লেখযোগ্য যে বৰ্তমান পূব মাণ্ডলিক আয়ুক্তৰ কাৰ্যালয়ৰ কাম-কাজ পুৰণি উপায়ুক্ত কাৰ্যালয়ৰ পৰা চলিব। ইতিমধ্যে এই কাৰ্যালয় স্থাপনৰ বাবে ভূমি চিনাক্ত কৰি থকা হৈছে বুলিও জনায়।
এই অনুষ্ঠানত উপ মুখ্য মন্ত্ৰী চাওনা মিন, মন্ত্ৰীমণ্ডল, সংসদীয় সচিৱ, বিধায়ক, মুখ্য সচিৱ সত্য গোপাল, মাণ্ডলিক উপায়ুক্ত বলুঙ পাৰ্মীৰ লগতে ১১ খন জিলাৰ উপায়ুক্তৰ লগতে আৰক্ষী অধীক্ষকসকল উপস্থিত থাকে।