প্ৰি-জুডিমা মহোৎসৱ উপলক্ষে হাফলঙত বাইক ৰেলী
বহু অপেক্ষিত ‘জুডিমা’ মহোৎসৱৰ তৃতীয় সংস্কৰণটো ডিমা হাচাও জিলাৰ দিবাৰাই গাওঁত অহা ২৮-২৯ ডিচেম্বৰত দুদিনীয়াকৈ অনুষ্ঠিত হ’ব।
ডিমা হাচাও পৰ্যটন বিভাগৰ সহযোগত ডিবৰাই হাফলঙৰ জুডিমা মহোৎসৱ আয়োজক কমিটিয়ে আয়োজন কৰা এই মহোৎসৱখনি দুদিনীয়া কাৰ্যসূচীৰে অনুষ্ঠিত কৰাৰ বাবে সকলো প্ৰস্তুতি সম্পূৰ্ণ হৈ উঠিছে। এই উৎসৱত স্থানীয়ভাৱে চাউলেৰে প্ৰস্তুত কৰা সোৱাদ পানী জুডিমাই বিশেষভাৱে সমাদৰ লাভ কৰিব।
সেয়েহে ইয়াৰ লগত সংগতি ৰাখি জিলাৰ বিভিন্ন জাতি জনগোষ্ঠীৰ মাজত একতা তথা ভাতৃত্ববোধ সুদৃঢ় কৰাৰ লক্ষ্য আগত ৰাখি আজি প্ৰি-জুডিমা মহোৎসৱ বাইক ৰেলীৰ আয়োজন কৰা হয়। শতাধিক বাইকাৰ্ছে অংশগ্ৰহণ কৰা ৰেলীখন উদ্বোধন কৰে ডিমা হাচাও জিলাৰ জিলা উপায়ুক্ত দেবজ্যোতি হাজৰিকায়। ৰেলী উদ্বোধন কৰি উপায়ুক্ত গৰাকীয়ে কয় প্ৰাকৃতিক সৌন্দৰ্যতাৰে ভৰপুৰ ডিমা হাচাও জিলাত লাহে লাহে পৰ্যটকৰ সংখ্যা বৃদ্ধি পাবলৈ ধৰিছে। যাৰ ফলত এনে মহোৎসৱে পৰ্যটক সকলক ডিমা হাচাওৰ ফালে অধিক আগ্ৰহী কৰি তুলিব বুলি কয়। আজিৰ এই বাইক ৰেলী দিবাৰাই গাওঁ হৈ জায়ন গাওঁ যাব তাৰ পৰা ল’ৱাৰ হাফলং হৈ হাফলং চহৰৰ মাজেৰে আহি দিবাৰাইত ৰেলীৰ সামৰণি পৰিব।
লক্ষ্যণীয় যে এই মহোৎসৱৰ নাম ডিমাচা সম্প্ৰদায়ৰ পৰম্পৰাগত চাউলৰ পৰা বনোৱা সোৱাদ পানী ‘জুডিমা’ৰ নামেৰে ৰখা হৈছে আৰু ই হৈছে ডিমাচাসকলৰ সমাজ জীৱনৰ এক অৱিচ্ছেদ্য অংগ।
জিলাখনৰ চহকী সাংস্কৃতিক ঐতিহ্যৰ এক সাংকেতিক উৎযাপনৰ উপৰিও স্থানীয় মদ প্ৰস্তুতকাৰীসকলৰ বিকল্প জীৱিকাৰ সন্ধান আৰু জিলাখনত বাস কৰা জনগোষ্ঠীয় গোটসমূহৰ মাজত পৰ্যটনৰ সম্ভাৱনাসমূহ দাঙি ধৰাই এই মহোৎসৱ আয়োজনৰ মূল উদ্দেশ্য।