বনৰক্ষী সকলৰ বাবে কাজিৰঙাত বিশেষ প্ৰশিক্ষণ কাৰ্যসূচী

কাজিৰঙা ৰাষ্ট্ৰীয় উদ্যানৰ অন্তৰ্গত বাগৰি ৰেঞ্জত বনৰক্ষী সকলৰ কাৰনে এক বিশেষ প্ৰশিক্ষণ কাৰ্যসূচী আৰম্ভ কৰা হৈছে।

‘প্ৰশিক্ষকৰ প্ৰশিক্ষণ’ শীৰ্ষক ৰাজ্যৰ বন বিভাগৰ পৃষ্ঠপোষকতাত আয়োজিত বিশেষ প্ৰশিক্ষণ কাৰ্যসূচীটোত ৩০ গৰাকী বনৰক্ষীক প্ৰশিক্ষণ প্ৰদান কৰা হয়।

উক্ত প্ৰশিক্ষণ সমাপ্ত কৰাৰ পিছত বনৰক্ষী সকলে তেওঁলোকৰ সংশ্লিষ্ট ফৰেষ্ট ৰেঞ্জ সমূহলৈ উভতি গৈ আন বনকৰ্মী সকলক প্ৰশিক্ষণ দিব।

উল্লেখযোগ্য যে দক্ষিণ আফ্ৰিকাৰ এখন ফৰেষ্ট কলেজৰ অভিজ্ঞ প্ৰশিক্ষক ৱেন্টাৰ ক’মব্ৰিকে নিৰ্বাচিত ৩০গৰাকী বনৰক্ষীক প্ৰশিক্ষণ দিছে।

বনৰক্ষী সকলক চোৰাংচিকাৰীৰ বিৰুদ্ধে যুঁজাৰ লগতে ক্ষেত্ৰ নিৰীক্ষণ, উন্নতমানৰ অস্ত্ৰৰ ব্যৱহাৰ তথা যিকোনো প্ৰতিকূলতাৰ সৈতে মোকাবিলা কৰিবলৈ প্ৰশিক্ষণ দিয়া হৈছে।

কাজিৰঙা ৰাষ্ট্ৰীয় উদ্যান কৰ্তৃপক্ষৰ উদ্যোগত আৰু ৱৰ্ল্ড ৱাইল্ডলাইফ ফাণ্ডৰ সহযোগত আয়োজন কৰা প্ৰশিক্ষণ শিবিৰটোত কাজিৰঙা ৰাষ্ট্ৰীয় উদ্যান, মানাহ ৰাষ্ট্ৰীয় উদ্যান, পবিতৰা অভয়াৰণ্য আৰু ওৰাং ৰাষ্ট্ৰীয় উদ্যানৰ বন বিষয়াসকল উপস্থিত থাকে।

উক্ত ৩০ গৰাকী প্ৰশিক্ষাৰ্থীৰ ভিতৰৰ ১০ গৰাকীক পিছৰ পৰ্যায়ত উচ্চমানৰ প্ৰশিক্ষণৰ বাবে নিৰ্বাচিত কৰা হ’ব বুলি কাজিৰঙাৰ মাণ্ডলিক বন বিষয়া ৰোহিনী বল্লভ শইকীয়াই জানিবলৈ দিয়ে।

কাজিৰঙা ৰাষ্ট্ৰীয় উদ্যানৰ অগৰাতলি ৰেঞ্জত দ্বিতীয় পৰ্যায়ৰ প্ৰশিক্ষণ প্ৰদান কৰা হ’ব বুলি জানিবলৈ দি শইকীয়াই কয় যে এই প্ৰশিক্ষণে বনৰক্ষী সকলক চোৰাংচিকাৰীক প্ৰতিৰোধ কৰাত অধিক দক্ষ কৰি তুলিব।