বাক্সাত পাৱাৰগ্ৰীডে অধিগ্ৰহণ কৰা মাটিৰ উচিত মূল্য বিচাৰি অহা কৃষকক আৰক্ষীৰ নিৰ্মম প্ৰহাৰক লৈ অব্যাহত আছে উত্তেজনা
নিজৰ অধিগৃহীত ভূমিৰ উচিত মূল্য বিচাৰি আহি আৰক্ষী-চি আৰ পি জোৱানৰ পৰা প্ৰহৃত হ’ব লগা হ’ল প্ৰায় অৰ্ধ শতাধিক কৃষক। বাক্সা জিলাৰ বাগানপাৰা ৰাজহচক্ৰৰ অধীনৰ ধমধমাত ১৯ মাৰ্চত হোৱা এই ঘটনাৰ পিছৰ চেপা উত্তেজনা এতিয়াও অব্যাহত আছে অঞ্চলটোত।
উল্লেখযোগ্য যে আছাম ইলেকট্ৰিচি গ্ৰীড ক’ৰ্প’ৰেইশ্যনে ৰঙিয়াৰ পৰা চালাকাটিলৈ উচ্চ ক্ষমতাসম্পন্ন বিদ্যুৎ পৰিবহণৰ বাবে উক্ত অঞ্চলটোৰ বহু কৃষকৰ মাটি অধিগ্ৰহণ কৰিছিল। কিন্তু কৃষক সকলে দাবী কৰা অনুসৰি তাৰ বাবত তেওঁলোকে কৰ্তৃপক্ষৰ উচিত মূল্য লাভ কৰা নাই।
কৃষকক উচিত মূল্য নিদিয়াকৈয়ে তেওঁলোকৰ মাটিৰ ওপৰত বহুওৱা খুঁটাত তাঁৰ সংযোগ কৰিবলৈ অহাত কৃষকসকল আহি পথাৰত সমবেত হয় আৰু পাৱাৰগ্ৰীডৰ বিষয়াৰ পৰা উচিত মূল্য বিচাৰে। লগতে উচিত মূল্য আদায়ৰ অবিহনে তাঁৰ লগোৱা কাম বন্ধ কৰিবলৈ দাবী কৰে।
সেই সময়ত তাত পাৱাৰগ্ৰীডৰ বিষয়াৰ লগতে বাক্সা জিলাৰ অতিৰিক্ত উপায়ুক্ত ৰাতুল পাঠক, বাগানপাৰা ৰাজহ চক্ৰ বিষয়া উপস্থিত আছিল। বহু সময় ধৰি দুয়ো পক্ষৰ মাজত বাদ-প্ৰতিবাদ চলাৰ পিছতো বিষয়টোৰ মীমাংসা নোহোৱাত ক্ষুভিত কৃষকে পাৱাৰগ্ৰীডৰ এখন গাড়ীৰ ক্ষতিসাধন কৰে। ইয়াৰ পিছতে পৰিস্থিতি অধিক উত্তপ্ত হৈ পৰে।
এই অচিলাতে তাত উপস্থিত পাৱাৰগ্ৰীডৰ বিষয়া আৰু উপস্থিত আৰক্ষী বিষয়াৰ নিৰ্দেশত তাত মোতায়েন কৰি ৰখা আৰক্ষী জোৱান আৰু চি আৰ পি এফৰ জোৱানসকল প্ৰতিবাদী কৃষকসকলৰ ওপৰত জঁপিয়াই পৰে। জোৱানসকলে কৃষকসকলক নিৰ্মমভাৱে প্ৰহাৰ কৰি তাৰ পৰা খেদি পঠিয়ায়। লাঠীচালনাৰ ফলত প্ৰায় ৫০জন প্ৰতিবাদী লোক গুৰুতৰভাৱে আহত হয়। ইয়াৰে আঘাত অধিক গুৰুতৰ তিনিজনক নলবাৰীৰ চিকিৎসালয়লৈ প্ৰেৰণ কৰা হৈছে আৰু বাকীসকলক প্ৰাথমিক চিকিৎসা দিয়া হৈছে।
এই ঘটনাক সচেতন মহলে গৰিহণা দিয়াৰ লগতে প্ৰতিবাদটোত অংশগ্ৰহণ কৰা কৃষকসকলে কয় যে আৰক্ষী-চি আৰি পি এফ লগাই তেওঁলোকক দমন কৰিব নোৱাৰে। তেওঁলোকে উচিত মূল্য নোপোৱা পৰ্য্যন্ত প্ৰতিবাদ কৰি যাব।