ৰাজনৈতিক আক্ৰোশৰ বাবেই চৰকাৰে অৰ্কিড পাৰ্কৰ মাটিৰ পট্টা স্থায়ী কৰি দিয়া নাই : অখিল গগৈ

অৰ্কিড পাৰ্কৰ মাটিৰ সকলো নথি-পত্ৰ তেওঁলোকৰ হাতত আছে বুলি মন্তব্য কৰি গগৈয়ে কয়, ‘মাটিৰ পত্তা স্থায়ী কৰি নিদি পেছাদাৰী দালালৰ হতুৱাই আমাৰ বিৰুদ্ধে এটাৰ পিছত আন এটা গোচৰ ৰুজো কৰি আছে।’

তাৎপৰ্য্যপূৰ্ণভাবে কৃষক নেতাজনে চৰকাৰে বিচাৰিলে অৰ্কিড উদ্যানখন চৰকাৰক দিবলৈ প্ৰস্তুত আছে বুলি সদৰী কৰি তেওঁ কয়, ‘চৰকাৰে যদি তাত কৰ্মৰত কৰ্মচাৰীসকলৰ চাকৰি কৰ্তন নকৰে অথবা আজি মোলৈ সৰ্বানন্দ সোণোৱালে যোগাযোগ কৰে তেন্তে আজিয়েই এই অৰ্কিড পাৰ্কখন চৰকাৰক গতাই দিবলৈ প্ৰস্তুত আছো। কাৰণ আমি পূৰ্বতেই চুক্তিবদ্ধ আছিলো যদি চৰকাৰে বিচাৰে তেন্তে এইখন চৰকাৰক দি দিয়া হ’ব।‘’

আনহাতে ৰকিবুল হুছেইনৰ পৰা ৫ কোটি টকা লৈ উক্ত উদ্যান নিৰ্মাণ কৰা বুলি কালি দুলাল বৰা নামৰ ব্যক্তিজনে তোলা অভিযোগক এক ভূৱা প্ৰচাৰ আখ্যা দি তেওঁ কয়, ‘যদি ৰকিবুল হুছেইন নাইবা আন কোনো ব্যক্তিৰ পৰা ধন লৈ পাৰ্কখন মুকলি কৰা বুলি প্ৰমাণ দিব পাৰে তেন্তে সেইদিনাই আমি সেই পাৰ্কখন আমাৰ হাতৰ পৰা এৰি দিম।’

তদুপৰি উদ্যানখনৰ পৰা কৃষক মুক্তি সংগঠনৰ সদস্যই অৰ্কিড বিক্ৰী কৰা বুলি অভিযোগ কৰাসকলক তেওঁ মহামূৰ্খ আখ্যা দি কয়, ‘প্ৰাকৃতিকভাৱে উৎপন্ন হোৱা অৰ্কিডৰ বিষয়ে বন্য আইনত কি উল্লেখ আছে সেয়া জানি লোৱাটো ভাল। যদি কোনোবাই  চোৰাংভাবে এই অৰ্কিড বিক্ৰী কৰে তেন্তে তেওঁ বন্য আইনৰ অধীনত লগে লগে গ্ৰেপ্তাৰ হ’ব।’

যদিহে তেওঁলোকৰ বিৰুদ্ধে অৰ্কিড বিক্ৰী কৰাৰ প্ৰমাণ দিব পাৰে তেন্তে জেইলত যাবলৈ প্ৰস্তুত আছে বুলিও কৃষক নেতাজনে মন্তব্য কৰে।

তাৎপৰ্য্যপূৰ্ণভাবে আজিৰ সংবাদমেলত কৃষক নেতাজনে ‘আসাম ট্ৰিবিউন’ নামৰ ইংৰাজী বাতৰি কাকতখনে তেওঁৰ বিৰুদ্ধে কেৱল নেতিবাচক বাতৰিহে প্ৰকাশ কৰি আহিছে বুলি মন্তব্য কৰি কয় যে কাকতখনৰ চৰকাৰৰ পৰা পেঞ্চন লাভ কৰা কেইগৰাকীমান সাংবাদিকে উক্ত বাতৰি পৰিবেশন কৰিছিল।