বিদ্ৰোহী গোটৰ উপৰ্যুপৰি কৰ সংগ্ৰহত ডিমাপুৰৰ ব্যৱসায়ীৰ ব্যৱসায় বন্ধ হোৱাৰ উপক্ৰম

নাগালেণ্ডৰ বাণিজ্যিক চহৰ ডিমাপুৰত ব্যৱসায়িক প্ৰতিষ্ঠান সমূহৰ ওপৰত বিভিন্ন নাগা বিদ্ৰোহী সংগঠনে চলাই অহা উপৰ্যুপৰি কৰ সংগ্ৰহৰ ফলত ডিমাপুৰ চেম্বাৰ অব কমাৰ্চ এণ্ড ইণ্ডাছট্ৰি (ডি চি চি আই)এ ব্যৱসায়-বাণিজ্য বন্ধ কৰাৰ উপক্ৰম হৈছে।

এক প্ৰেছ বিবৃতিৰ জৰিয়তে ডি চি চি আয়ে নাগালেণ্ড চৰকাৰক বিষয়টোত অনতিপলমে হস্তক্ষেপ কৰি যথোপযুক্ত ব্যৱস্থা হাতত ল’বলৈ আহ্বান জনাইছে।

বিবৃতিটোত কোৱা অনুসৰি বিভিন্ন নাগা বিদ্ৰোহী গোটে ব্যৱসায়িক গোষ্ঠীৰ ওপৰত বছৰেকীয়া কৰ, এজেন্সি কৰ, গে’ট কৰ, পৰিবহণ কৰ, ছিণ্ডিকে’ট মাচুল আদিৰ নামত চলাই অহা ‘অগণিত আৰু অনিয়ন্ত্ৰিত অবৈধ কৰ সংগ্ৰহে’ ব্যৱসায়িক গোষ্ঠীক অতিষ্ঠ কৰি তুলিছে।

ডি চি চি আয়ে অতি খেদেৰে কয়, ‘সাধাৰণ কথাত ক’ব গ’লে, আমি প্ৰত্যেক সামগ্ৰীতে ১০’ৰ পৰা ১৫’টা কৰ দিওঁ।

ইমান বেছি অবৈধ কৰ দি বিশ্বৰ কোনো ঠাইত ব্যৱসায় টিকি থকা সম্ভৱ নহয় বুলি উল্লেখ কৰি ডি চি চি আয়ে কয় যে ডিমাপুৰত এতিয়া অবৈধ কৰ সংগ্ৰহৰ বাদে কোনো ধৰণৰ ব্যৱসায়েই তিষ্ঠি থাকিব নোৱাৰা হৈছে।

ইয়াৰ উপৰি সঘন ভাবুকি তথা ভীতি প্ৰদৰ্শনে ব্যৱসায়ীসকলক সম্পূৰ্ণ অসুৰক্ষিত কৰি তুলিছে বুলিছে বিবৃতিটোত কোৱা হয়।