বিলাসীপাৰাত ৰোমহৰ্ষক হত্যাকাণ্ড; নিজ ঘৰৰ বাৰান্দাতে ডেগাৰেৰে ডিঙি কাটিলে মহিলাক
বুধবাৰে পুৱতি নিশা অৰ্থাৎ ৰমজানৰ চেহেৰিৰ সময়ত বৰপেটাৰোডৰ বিলাসীপাৰাত সংঘটিত এক ৰোমহৰ্ষক হত্যাকাণ্ডই অঞ্চলটোত চাঞ্চল্যৰ সৃষ্টি কৰিছে।
ঘটনাৰ বিৱৰণি মতে, বিলাসীপাৰাৰ দুটি সন্তানৰ মাতৃ নুৰজাহান বেগম নামৰ মহিলা গৰাকীক নিজ গৃহৰ বাৰান্দাতেই কোনো দুস্কৃতিকাৰীয়ে ডেগাৰেৰে হানি খুচি ডিঙি কাটি হত্যা কৰে।
জানিব পৰা মতে মহিলাগৰাকীৰ ডাঙৰ সন্তান নাজিবুল ইছলামে তেওঁলোকৰ ঘৰৰ নিচেই ওচৰত থকা মছজিদত এতেকাফত বহিছিল। নিতৌ নাজিবুলক মছজিদত গাখীৰ আৰু কল খাবলৈ দিব অহা নুৰজাহানে আজি নিজৰ সন্তানক গাখীৰ আৰু কল দিব নহাত আহাৰ গ্ৰহণৰ বাবে পুত্ৰই নিজে ঘৰলৈ আহে।
কিন্তু বাসগৃহত উপস্থিত হৈয়েই নাজিবুলে নিজৰ মাতৃৰ তেজেৰে লুতুৰী পুতুৰী হৈ থকা নিথৰ মৃতদেহ প্ৰত্যক্ষ কৰে।
উল্লেখযোগ্য যে নুৰজাহান বেগমৰ এই ৰোমহৰ্ষক হত্যাকাণ্ড সংঘটিত হোৱাৰ সময়ত তেওঁৰ স্বামী ছাইফ উদ্দিন ঘৰত নাছিল বুলি জানিব পৰা গৈছে। চাকৰি সুত্ৰে তেওঁ বঙাইগাঁওৰ যোগীঘোপাত আছিল বুলি ঘৰৰ লোকে জানিবলৈ দিয়ে।
বিলাসীপাৰাৰ নুৰজাহান বেগমৰ এই হত্যাকাণ্ডৰ কাৰণ আৰু ইয়াৰ লগত কোন জড়িত আছে তাৰ অনুসন্ধানৰ বাবে আৰক্ষীয়ে নিজৰ তদন্ত অব্যাহত ৰাখিছে যদিও বাতৰি লিখা পৰলৈকে হত্যাকাৰিক কৰায়ত্ত কৰিবলৈ সক্ষম হোৱা নাই।