বিশ্বনাথৰ চতিয়াৰ পৰা কাজিৰঙাৰ বন বিষয়াই গ্ৰেপ্তাৰ কৰিলে দুৰ্ধৰ্ষ গঁড় চিকাৰী
কাজিৰঙা ৰাষ্ট্ৰীয় উদ্যানৰ ষষ্ঠ সংযোজনৰ বন বিভাগৰ বিষয়াই বৃহস্পতিবাৰে বিশ্বনাথ জিলাৰ চতিয়াৰ পৰা এজন দুৰ্ধৰ্ষ গঁড় চিকাৰীক গ্ৰেপ্তাৰ কৰে।
বন বিষয়াৰ হাতত গ্ৰেপ্তাৰ হোৱা চোৰাং চিকাৰীজনক চতিয়া আৰক্ষী থানাৰ অন্তৰ্গত বৰালীমাৰাৰ মহম্মদ ছাইদুল ইছলাম ওৰফে বৰবাবু বুলি চিনাক্ত কৰা হৈছে।
চোৰাং চিকাৰীজনক নৰ্দাৰ্ণ ৰেঞ্জৰ বন বিষয়াই আটক কৰাৰ পিছত কাজিৰঙা ৰাষ্ট্ৰীয় উদ্যানৰ বাগৰি ৰেঞ্জৰ আৰক্ষীক গতাই দিয়ে।
চলিত বৰ্ষৰ যোৱা ২২ মে’ত ধৃত ছাইদুলে গঁড় চিকাৰৰ বাবে লোৱা প্ৰচেষ্টাৰ সম্ভেদ লাভ কৰা হৈছিল। বিশ্বনাথ চাৰিআলিৰ বাঘমাৰিৰ আকবৰ আলী আৰু বিশ্বনাথ জিলাৰ আন চোৰাংচিকাৰীক গ্ৰেপ্তাৰ কৰাৰ পিছতে ছাইদুল গঁড় চিকাৰৰ সৈতে জড়িত থকাৰ কথা বন বিভাগে নিশ্চিত হৈছিল।
ইয়াৰ পূৰ্বে কাজিৰঙা ৰাষ্ট্ৰীয় উদ্যানৰ নৰ্দাৰ্ণ ৰেঞ্জ আৰু ৱেষ্টাৰ্ণ ৰেঞ্জৰ অধীনত ২০১৬ত পঞ্জীয়ন হোৱা দুটা গোচৰত ছাইদুলক গ্ৰেপ্তাৰ কৰা হৈছিল। গঁড় চিকাৰৰ লগতে অবৈধভাৱে গুলীৰে সৈতে ৩০৩ ৰাইফল লগত ৰখাৰ অভিযোগত সেইবাৰ ছাইদুলক গ্ৰেপ্তাৰ কৰা হৈছিল।