বিশ্ব ২০ অনূৰ্ধ্ব এথলেটিকছ : ৪০০ মিটাৰৰ ছেমি ফাইনেলত হিমা দাস

এটাৰ পাছত আন এটা সফলতা অৰ্জন কৰাৰ পাছত অসমৰ হিমা দাসে ফিনলেণ্ডৰ টামপেৰত চলি থকা ২০ বছৰ অনূৰ্ধ্ব এথলেটিকছ চেম্পিয়নশ্বিপত ফেভাৰিট হিচাপে অৱতীৰ্ণ হৈ মহিলাৰ ৪০০ মিটাৰৰ ছেমি ফাইনেলত প্ৰৱেশ কৰিবলৈ সক্ষম হয়।

১০ জুলাই অৰ্থাৎ মঙলবাৰে প্ৰতিযোগিতাৰ উদ্বোধনীৰ দিনাই হিমাই হিটছত ৫২.২৫ ছেকেণ্ডেৰে প্ৰথম স্থান অধিকাৰ কৰে। হিটছত হিমাৰ প্ৰতিদ্বন্দ্বী জামাইকাৰ ষ্ট্ৰেছি আন উইলিয়ামছক অতি সহজে অতিক্ৰম কৰে। জামাইকাৰ এথলীটগৰাকীয়ে নিজৰ দৌৰ সম্পন্ন কৰিবলৈ সময় লয় ৫২.৭২ ছেকেণ্ড।

আনহাতে হিমাৰ উপৰি ৪০০ মিটাৰৰ ছেমি ফাইনেলত ভাৰতৰ আন এগৰাকী খেলুৱৈ জিষ্ণা মেথিউৱেও হিটছত ৫৪.৩২ ছেকেণ্ড সময় লৈ ছেমি ফাইনেলত নিজৰ স্থান সুৰক্ষিত কৰে।

উল্লেখ্য যে ২০ বছৰ অনূৰ্ধ্ব এথলেটিকছ চেম্পিয়নশ্বিপত ভাৰতৰ সকলো আশা তাৰকা দৌৰবিদ হিমা দাস। এছিয়ান গেইমছৰ পূৰ্বে নিজকে সাজু কৰি তুলিবলৈ উপযুক্ত মঞ্চ হিচাপে বিবেচিত হৈছে ২০ বছৰ অনূৰ্ধ্ব এথলেটিকছ চেম্পিয়নশ্বিপ। ইয়াত পদক মানেই যেন আগন্তুক জাকাৰ্টা এছিয়ান গেইমছৰ বাবে প্ৰচুৰ আত্মবিশ্বাস।

আনহাতে এই প্ৰতিযোগিতাৰ পিছত তেওঁ এছিয়ান গেইমছৰ প্ৰস্তুতিৰ বাবে ইউক্ৰেইনলৈ যাব আৰু ইউক্ৰেইনৰ পৰাই ইণ্ডোনেছিয়াৰ জাকাৰ্টাত অনুষ্ঠিত হ’বলগীয়া এছিয়ান গেইমছত ভাৰতৰ হৈ অংশগ্রহণ কৰিব বুলি জানিব পৰা গৈছে।