বোকাখাতত মহকুমা প্ৰশাসনৰ উদ্যোগত আন্তঃৰাষ্ট্ৰীয় যোগ দিৱস উদযাপন

বিশ্বৰ বিভিন্ন প্ৰান্তৰ লগতে আজি বোকাখাততো চতুৰ্থ সংখ্যক আন্তঃৰাষ্ট্ৰীয় যোগ দিৱস পালন কৰা হয় ৷ এই উপলক্ষে বোকাখাতৰ অফিচাৰ্চ ক্লাবত পুৱাতে আয়োজিত কাৰ্যসূচী বন্তি প্ৰজ্বলনেৰে আনুষ্ঠানিক ভাৱে উদ্বোধন কৰে বোকাখাতৰ মহকুমাধিপতি বিবেক শ্যাম আৰু বোকাখাতৰ প্ৰাক্তন বিধায়ক বলোভদ্ৰ তামুলীয়ে।

বোকাখাতৰ মহকুমা প্ৰশাসনৰ উদ্যোগত ‘আয়ুস মিচন’, ‘আৰ্ট অৱ লিভিং’ আৰু গোলাঘাট পশ্চিম উন্নয়ন খণ্ড বোকাখাতৰ সহযোগত বোকাখাতত আয়োজিত আন্তঃৰাষ্ট্ৰীয় যোগ দিৱসৰ কাৰ্যসুচীত প্ৰায় শতাধিক লোকে অংশ গ্ৰহন কৰে।

আয়ুস মিচনৰ জিলা সমন্বয়ক হেমন্ত গগৈ আৰু আৰ্ট অৱ লিভিংঙৰ প্ৰশিক্ষক বিজয় বড়োয়ে যোগ দিৱস কাৰ্যসূচীত উপস্থিত লোকসকলক যোগাভ্যাসৰ প্ৰশিক্ষণ প্ৰদান কৰে।

প্ৰশিক্ষনত বোকাখাত মহকুমাৰ বিষয়া আমোলাৰ উপৰিও বিভিন্ন বিদ্যালয়ৰ ছাত্ৰ-ছাত্ৰী, দল সংগঠনৰ লগতে বোকাখাত মহকুমা সাংবাদিক সন্থা, বোকাখাত প্ৰেছ ক্লাব আৰু ইলেক্ট্ৰনিকচ মেডিয়া জাৰ্নেলিষ্ট এচোচিয়েচনেও অংশ গ্ৰহন কৰে।

মহকুমা প্ৰশাসনৰ উপৰিও বোকাখাতৰ শংকৰ দেৱ বিদ্যালয়ৰ প্ৰাঙ্গনত পুৱা ৫ বজাৰ পৰা ৰাষ্ট্ৰীয় স্বয়ং সেৱক সংঘ আৰু বিশ্ব হিন্দু পৰিষদৰ উদ্যোগত আন্তঃৰাষ্ট্ৰীয় যোগ দিৱস অনুষ্ঠিত হয় ৷