বোকাজানৰ খটখটিত বন্যহস্তীৰ আক্ৰমণত প্ৰাণ গ’ল এটি শিশুকে ধৰি গৰ্ভৱতী মহিলাৰ

কাৰ্বি আংলং জিলাৰ বোকাজান মহকুমাৰ খটখটিৰ ছানডে বজাৰ এলেকাত শুকুৰবাৰে মাজনিশা পুনৰ বন্যহস্তীৰ আক্ৰমণৰ এক ঘটনা সংঘটিত হয়।

জানিব পৰা মতে শুকুৰবাৰে মাজনিশা সকলো শুই থকা সময়তে বনাঞ্চলৰ পৰা ওলাই অহা এটি বনৰীয়া হাতীৰ জাকে বোকাজান মহকুমাৰ বোকাজান বন সংমণ্ডলৰ অন্তৰ্গত খটখটিৰ ছানডে বজাৰ এলেকাত প্ৰবেশ কৰি তাণ্ডৱ সৃষ্টি কৰে৷

হাতীৰ জাকটোৱে এগৰাকী গৰ্ভাৱতী মহিলা আৰু তেওঁৰ ৪ বছৰীয়া কন্যা সন্তানটোকো আক্ৰমণ চলায়। হাতীৰ আক্ৰমণত মুন্নী দেৱী নামৰ ন-মহীয়া গৰ্ভৱতী মহিলাগৰাকী আৰু ৪ বছৰীয়া পূজা কুমাৰী নামৰ শিশুটিয়ে কৰুণ মৃত্যুক আকোঁৱালি লয়।

হাতীৰ জাকটোৱে অঞ্চলটোৰ কেইবাটাও বাসগৃহত আক্ৰমণ চলাই ধ্বংসস্তূপত পৰিণত কৰাৰ লগতে বাৰীৰ শাক-পাচলি আদিও তহিলং কৰে৷

খাদ্য আৰু আশ্ৰয়ৰ সন্ধানত বনাঞ্চলৰ পৰা জনাঞ্চললৈ ওলাই অহা বন্যহস্তীয়ে ৰাজ্যৰ বিভিন্ন স্থানত তাণ্ডৱ চলাই অহাৰ বাতৰি পোৱা যায়। হাতীৰ আক্ৰমণত ইতিমধ্যে ৰাজ্যখনত কেইবাজনো লোক নিহত হৈছে।

বনাঞ্চলৰ ওচৰত থকা জনবসতি প্ৰধান অঞ্চলত থকা শস্য পথাৰৰ পৰা ঘৰ দুৱাৰ আৰু মানুহৰ ওপৰত বন্যহস্তীৰ সন্ত্ৰাস বৃদ্ধি পাইছে। ৰাজ্যৰ বহু অঞ্চলৰ ৰাইজ বৰ্তমান হাতীৰ আক্ৰমণৰ পৰা ৰক্ষা পাবলৈ ভয়ে ভয়ে জীয়াই থাকিবলৈ বাধ্য হৈছে। বনাঞ্চলত মানুহৰ বসতি বাঢ়ি অহাৰ লগে লগেই বন্যহস্তীৰ উপদ্ৰৱৰ ঘটনাও বৃদ্ধি পাইছে।

কাৰ্বি আংলং জিলাত কেৱল শুকুৰবাৰে নিশাই নহয়, প্ৰায়ে নিশা বনাঞ্চলৰ পৰা  মানুহৰ বসতি স্থানলৈ ওলাই অহা বন্যহস্তীৰ সন্ত্ৰাসৰ ভয়ত প্ৰাণটো হাতৰ মুঠিত লৈ জীৱন যাপন কৰিবলগীয়া হৈছে ৰাইজে। আনহাতে, বন বিভাগে হাতীৰ জাকটোক দূৰলৈ খেদি পঠিওৱাত ব্যৰ্থ হোৱাত বন বিভাগৰ বিৰুদ্ধে তীব্ৰ ক্ষোভ উজাৰিছে ভুক্তভোগী ৰাইজে।