বৰভাগত কৃতী ছাত্ৰ-ছাত্ৰীক সম্বৰ্ধনা বৰক্ষেত্ৰীৰ বিধায়ক নাৰায়ণ ডেকাৰ

নলবাৰী জিলাৰ ৬০ নং বৰক্ষেত্ৰী বিধান সভা সমষ্টিৰ অন্তৰ্গত বৰভাগ অঞ্চলৰ বিভিন্ন বিদ্যালয়ৰ পৰা সদ্য ঘোষিত হাইস্কুল শিক্ষান্ত পৰীক্ষা আৰু উচ্চতৰ মাধ্যমিক চূড়ান্ত পৰীক্ষাত বিশেষ সফলতা লাভ কৰা কৃতী ছাত্ৰ-ছাত্ৰীসকলক আজি সমষ্টিটোৰ বিধায়ক নাৰায়ণ ডেকাই অভিনন্দন তথা সম্বৰ্ধনা জনায়।

বৰভাগ অঞ্চলৰ আগশাৰীৰ শিক্ষানুষ্ঠান ‘বৰভাগ মহবিদ্যালয়’ত বিজেপি বিধায়ক নাৰায়ণ ডেকাৰ নিজা উদ্যোগত অনুষ্ঠিত আজিৰ এই সম্বৰ্ধনা তথা অভিনন্দন অনুষ্ঠানত অঞ্চলটোৰ ৫২ খন গাঁৱৰ প্ৰায় ৪০০ তকৈও অধিক ছাত্ৰ-ছাত্ৰীক সম্বৰ্ধনা জ্ঞাপন কৰে।

বৰভাগ মহাবিদ্যালয়ৰ অধ্যক্ষ ফণীধৰ ডেকাৰ সভাপতিত্বত অনুষ্ঠিত হোৱা সম্বৰ্ধনা অনুষ্ঠানটোত স্থানীয় বিধায়কগৰাকীয়ে হাইস্কুল আৰু উচ্চতৰ মাধ্যমিকত সফলতাৰে উত্তীৰ্ণ হোৱা ছাত্ৰ-ছাত্ৰীসকলক আগন্তুক দিনত আৰু অধিক একাগ্ৰতা আৰু নিষ্ঠাসহকাৰে অধ্যয়ণত ব্ৰতী হৈ সমাজৰ মংগলৰ হকে কাম কৰিবলৈ উৎসাহ প্ৰদান কৰে।

উল্লেখ্য যে আজিৰ এই অনুষ্ঠানতে ৰাজ্য চৰকাৰৰ শিক্ষা বিভাগে আয়োজন কৰা গুণোৎসৱত বৰভাগ অঞ্চলৰ যিসকল বিদ্যালয়ে এ প্লাছ গ্ৰেড লাভ কৰিছে সেই বিদ্যালয় সমূহকো বিধায়কগৰাকীয়ে সন্মানিত কৰাৰ লগতে অভিনন্দন জ্ঞাপন কৰে। লগতে সভাত উপস্থিত থকা বৰভাগ অঞ্চলৰ চৰকাৰী বিদ্যালয় সমূহৰ শিক্ষকসকলক আগন্তুক দিনটো এইদৰে নিষ্ঠাসহকাৰে শিক্ষাদান কৰি যাবলৈ বিধায়কগৰাকীয়ে অনুৰোধ জনায়।

বিধায়ক ডেকাৰ উদ্যোগত অনুষ্ঠিত হোৱা অভিনন্দন অনুষ্ঠানত বৰভাগ মহাবিদ্যালয়ৰ শিক্ষক-কৰ্মচাৰী, অঞ্চলটোৰ বিশিষ্ট ব্যক্তিসকল, শিক্ষক-শিক্ষয়ত্ৰী, অভিভাৱক-অভিভাৱিকাৰ লগতে বহুতো স্থানীয় লোক উপস্থিত থাকে।