ভাৰতীয় বক্সিং ফেডাৰেশ্বনৰ কাৰ্যনিৰ্বাহক পৰিষদলৈ নিৰ্বাচিত এল সৰিতা দেৱী

প্ৰাক্তন বিশ্ব তথা এছিয়ান বক্সিং চেম্পিয়ন এল সৰিতা দেৱী ভাৰতীয় বক্সিং ফেডাৰেশ্বনৰ কাৰ্যনিৰ্বাহক পৰিষদত মহিলা বক্সাৰৰ প্ৰতিনিধি হিচাপে নিৰ্বাচিত হৈছে।

ৰোহটকত চলি থকা ৰাষ্টীয় চেম্পিয়নশ্বিপত অনুষ্ঠিত হোৱা নিৰ্বাচনত মণিপুৰৰ বক্সাৰগৰাকীয়ে ৩১টা টীমৰ ২২গৰাকী অধিনায়কৰ পৰা ভোট লাভ কৰিবলৈ সক্ষম হয়।

উল্লেখযোগ্য যে সৰিতা হৈছে বক্সিং ফেডাৰেশ্বনৰ কাৰ্যনিৰ্বাহক পৰিষদত অন্তৰ্ভুক্ত হোৱা দ্বিতীয়গৰাকী বক্সাৰ। তেওঁৰ পূৰ্বে ২০১৬ চনত গুৱাহাটীত অনুষ্ঠিত ৰাষ্ট্ৰীয় চেম্পিয়নশ্বিপত কমনৱেলথ গেমছৰ স্বৰ্ণজয়ী মনোজ কুমাৰ অন্তৰ্ভুক্ত হৈছিল। বুধবাৰে অনুষ্ঠিত হোৱা নিৰ্বাচনটোত সৰিতাই তেওঁৰ একমাত্ৰ প্ৰতিদ্বন্দ্বী ৰেইলৱে স্প’ৰ্টছ প্ৰমোশ্বন ব’ৰ্ডৰ ছীমা পুনিয়াক পৰাস্ত কৰে।

কাৰ্যনিৰ্বাহক পৰিষদলৈ নিৰ্বাচিত হৈ ২০০৯ চনৰ অৰ্জুন বঁটা প্ৰাপক বক্সাৰগৰাকীয়ে মহিলা বক্সাৰসকলে সন্মুখীন হৈ অহা বিভিন্ন অসুবিধাৰ কথা উত্থাপন কৰি কয় যে উক্ত অসুবিধা সমূহৰ সমাধান কৰাই তেওঁৰ প্ৰধান লক্ষ্য হ’ব।