মঙলদৈত বাৰে বাৰে লুটপাতকাৰীৰ টাৰ্গেট হৈছে বেংকত ধন জমা ৰখা গ্ৰাহক

বাৰে বাৰে বেংকৰ গ্ৰাহকৰ জমা ধন টাৰ্গেট হৈছে লুটপাতকাৰীৰ। যোৱা ২০ ফেব্ৰুৱাৰিৰ দিনা দৰঙৰ এটা হেকাৰ চক্ৰই দলগাওঁ এছ বি আইৰ শাখাৰ পৰা এজন গ্ৰাহকৰ ৫ হাজাৰ টকা উলিয়াই নিছিল। পিছত আৰক্ষীয়ে হেকাৰ চক্ৰটোৰ মাজৰ এজন চহৰ আলীক গ্ৰেপ্তাৰ কৰিছিল। কিন্তু তাৰ এদিন পিছতে আজি আকৌ এছ বি আইৰ মঙলদৈ শাখাৰ চৌহদৰ পৰা আন এজনক আটক কৰে।

ছানি শ্বাহ (২২) নামৰ বঙাইগাৱঁৰ যুৱকজনে আজি চৌহদৰ পৰা আব্দুল মালিক নামৰ এজন লোকৰ পৰা ১ লাখ টকা থকা এটা পলিথিনৰ বেগ লৈ উধাও হ’ব খোজোতেই উপস্থিত লোকে ধৰে।

জানিব পৰামতে আব্দুল মালিক এজন ঠিকাদাৰ আৰু তেওঁ মঙলদৈৰ জয়ানগৰৰ বাসিন্দা। তেওঁ জনোৱামতে, তেওঁ নিজৰ মটৰচাইকেলখনত নিজৰ বেগটো আঁৰি লৈ যাবলৈ ওলাওঁতেই কোনোবাই ‘আপোনাৰ পইচা পৰিল’ বুলি চিঞৰা শুনে। মাত্ৰ কেই ছেকেণ্ডমানৰ বাবে তেওঁৰ মনোযোগ সেইপিনে যাওঁতেই এজন ল’ৰাই তেওঁৰ বেগটো টানি লৈ পলাবলৈ ওলাইছিল। কিন্তু পলাব নোৱাৰিলে। তেওঁলোকে ল’ৰাটোক ধৰিল। বেংকৰ ওচৰ-পাঁজৰৰ ব্যৱসায়ীসকলে জনোৱামতে এইটোৰ এটা চক্ৰ আছে আৰু সিহঁতে বেংক একাউণ্টধাৰীসকলে টকা উলিওৱাৰ লগে লগে তেওঁলোকক অনুসৰণ কৰে আৰু সুকীয়া সুকীয়া কৌশল অৱলম্বন কৰি টকা সৰকাই।

সূত্ৰটোৱে জনোৱামতে কিছু দিনৰ পূৰ্বে এগৰাকী বিধৱা মহিলা একে ঠাইতে একেদৰেই এই চক্ৰটোৰ বলি হৈছিল। মহিলাগৰাকীৰ পৰা চক্ৰটোৱে ৩০ হাজাৰ টকা সৰকাইছিল।

আৰক্ষীয়ে জনোৱামতে আজিৰ ল’ৰাটোৰ পৰা এখন ছুৰী উদ্ধাৰ কৰিছে। ল’ৰাজনে এতিয়ালৈকে আন কাৰো নাম লোৱা নাই বুলি আৰক্ষীৰ সূত্ৰটোৱে জনাইছে।