মজুৰি বৃদ্ধিৰ দাবীত অহা ২৭ ফেব্ৰুৱাৰিত ৰাজ্যৰ চাহ বাগিচাত ধৰ্মঘট

দীৰ্ঘ দিনৰ পৰা উচিত প্ৰাপ্যৰ পৰা বঞ্চিত থকা চাহ শ্ৰমিকসকলে বিগত সময়ছোৱাত বহুবাৰ বাগিচা কৰ্তৃপক্ষৰ সৈতে আলোচনা-বিলোচনাত মিলিত হৈছে যদিও তেওঁলোকে আকাংক্ষিত মজুৰি আজি পৰ্য্যন্ত লাভ কৰা নাই। সেয়ে ইয়াৰ প্ৰতিবাদত অহা ২৭ তাৰিখে চাহ শ্ৰমিকসকলে এক ধৰ্মঘট কাৰ্য্যসূচী হাতত লৈছে। মজুৰি বৃদ্ধিৰ দাবীত প্ৰতিবাদী কাৰ্যসূচী গ্ৰহণ কৰিছে অসম চাহ মজদুৰ সংঘই।

সংঘৰ পানীতোলা শাখাৰ সম্পাদক ৰাজু চাহু স্বাক্ষৰিত এক প্ৰেছ বিজ্ঞপ্তিৰ জৰিয়তে এই কাৰ্য্যসূচীৰ কথা সংবাদ মাধ্যমক জনাইছে সংগঠনটোৱে।

বিজ্ঞপ্তিটোত জনোৱামতে মজুৰি বৃদ্ধিৰ দাবীৰ লগতে কৰ্মচাৰীসকলে বৰ্তমানে পাই থকা ভ্ৰমণ বানচ ১৫০০ টকাৰ পৰা ৬০০০ টকালৈ বৃদ্ধি কৰা আৰু স্থায়ী শ্ৰমিকসকলৰ ঘৰভাৰা প্ৰতিমাহে ৫০০ টকালৈ বৃদ্ধি কৰাৰ তিনিদফীয়া দাবীৰে চাহ মজদুৰ সংঘই এই ধৰ্মঘট কাৰ্যসূচীটো ৰূপায়ণ কৰিব।

ধৰ্মঘটৰ লগতে চাহ শ্ৰমিকসকলে বাগিচাই বাগিচাই প্ৰতিবাদী শোভাযাত্ৰাও উলিওৱা হ’ব বুলি বিজ্ঞপ্তিটোত প্ৰকাশ।